უკრაინის პრეზიდენტმა, ვოლოდიმირ ზელენსკიმ ქალაქ ბახმუტს „ჩვენი ციხესიმაგრე“ უწოდა, რუსული ძალები ბოლო ექვსი თვის განმავლობაში ბახმუტის აღებას ცდილობენ, თუმცა ახლა მათ გააძლიერეს შეტევა, - წერს BBC-ი სტატიაში სათაურით რუსები ნელ-ნელა ბახმუტის ირგვლივ მაგრდებიან.

BBC-ის ჟურნალისტი წერს, რომ ქალაქის ზოგიერთ უბანში ქუჩის ბრძოლები მიმდინარეობს, თუმცა უკრაინული ძალები მაინც ინარჩუნებენ ქალაქს, მიუხედავად ტემპერატურისა და საბრძოლო მასალის შემცირებისა.

„ყველა სახის საბრძოლო მასალის დეფიციტი გვაქვს, განსაკუთრებით საარტილერიო ჭურვების“, - ამბობს უკრაინელი ოფიცერი BBC-სთან საუბარში.

BBC-ი აღნიშნავს, რომ ბახმუტისთვის ბრძოლა არის ომი ომში.

„აქ ერთ-ერთ ყველაზე სასტიკ ბრძოლებს ჰქონდა ადგილი. ახლა კი რუსული ძალები მაგრდებიან ნელ-ნელა. მოსკოვს ახლა ქმედითი კონტროლი აქვს ქალაქის ორივე მთავარ გზაზე“, - ნათქვამია სტატიაში.

„ახლა [ისინი] ნელ-ნელა იმარჯვებენ. მათ მეტი რესურსი აქვთ, ასე რომ, თუ გრძელვადიან თამაშს ითამაშებენ, მოიგებენ. ვერ ვიტყვი, რამდენი ხანი დასჭირდება ამას“, - განუცხადა BBC-ის 93-ე მექანიზებული ბრიგადის წარმომადგენელმა.

BBC-ი აღნიშნავს, რომ თუ ბახმუტის დამცველები უკან დაიხევენ, ეს გზას გაუხსნის რუსეთს აღმოსავლეთ უკრაინის უფრო დიდი ქალაქებისკენ, როგორიცაა კრამატორსკი და სლოვიანსკი.

მოსკოვმა გააძლიერა თავდასხმები აღმოსავლეთით და სამხრეთით დონბასის რეგიონის ფრონტის სხვა ხაზზე. უკრაინის ოფიციალური პირები ამბობენ, რომ რუსეთის ახალი შეტევა უკვე მიმდინარეობს.