ცხინვალის დე ფაქტო ლიდერმა ალან გაგლოევმა ე.წ. პარლამენტის „დელიმიტაციის და დემარკაციის კომისიას“ გაწეული სამუშაოსთვის მადლობა გადაუხადა. ამის შესახებ „ეხო კავკაზა“ იუწყება.

„უნდა მოვძებნოთ სპეციალისტები, რომლებიც იმ მასალების მიხედვით, რომლებიც უკვე შეგროვებულია, რუკას მოამზადებენ. უნდა ვიმუშაოთ არსებული პრობლემების გადასაჭრელად“, - განაცხადა გაგლოევმა.

მისი თქმით, ამჟამად ე.წ. სამხრეთ ოსეთი საზღვარს დემარკაციას ცალმხრივად ახორციელებს, მაგრამ „მოვა დრო, როდესაც ოსური მხარე საქართველოს წარმომადგენლებთან ერთად მოლაპარაკებას გამართავს, რათა სახელმწიფო საზღვრები დადგინდეს“.

ცნობისთვის, ცხინვალის დე ფაქტო რეჟიმი და რუსი ოკუპანტები საოკუპაციო ხაზის გასწვრივ ე.წ. ბორდერიზაციის სამუშაოებს ახორციელებენ, რასაც ქართული მხარე მცოცავ ოკუპაციასა და სრულ უკანონობას უწოდებს.