გერმანელი სამხედრო ექსპერტის, მარკუს კოიპის განცხადებით, უკრაინა რუსეთთან ომში ოქტომბერში გამარჯვებას მიაღწევს. ამის შესახებ Deutche Welle იუწყება.

კოიპი, რომელიც ციურიხის სამხედრო აკადემიის ლექტორია, ამბობს, რომ შემოდგომისთვის რუსეთში სამხედრო, ეკონომიკური და ადამიანური რესურსები საბოლოოდ ამოიწურება, ხოლო მისი ანაზღაურება მოსკოვს არ შეუძლია.

ექსპერტის შეფასებით, რუსეთმა უკრაინის ომში უკვე 10 ათასამდე ერთეული ტანკი და მძიმე ტექნიკა დაკარგა.

„ეს მხოლოდ დროის ამბავია, როდის ამოეწურება რეზერვები რუსეთს,“ - განაცხადა კოიპმა.

იმ შეტევის კომენტირებისას, რომელიც რუსეთმა უკრაინაში 2022 წლის დეკემბერში დაიწყო, ექსპერტმა მას „კატასტროფული“ უწოდა.

ექსპერტის თქმით, ძირითადი ყურადღება ბახმუტზეა გამახვილებული, მაგრამ რუსეთი კიდევ ოთხი მიმართულებით ცდილობდა შეტევას - კრემენაიას, ავდეევკას, მარინკას და უგლედარის მიდამოებში.

„სამხედრო ლოგიკასთან ამ ოპერაციას არაფერი აქვს საერთო. ეს არის მატერიალური, ადამიანური რეზერვების მასიური ხარჯვა მინიმალური პროგრესის მისაღწევად“, - ამბობს გერმანელი ექსპერტი.

მისივე თქმით, ის ფაქტი, რომ რუსეთი ფრონტზე ძველ „ტ-55“ და „ტ-64“-ის ტანკებს აგზავნის, ტექნოლოგიური რეგრესის მაჩვენებელია.

უკრაინის ჯარი კი, პირიქით, მოძველებული საბჭოთა ტექნიკას თანამედროვე, ნატოს სტანდარტების დასავლური ტექნიკით ცვლის, კერძოდ საუბარია ტანკებზე და ჯავშანტრანსპორტიორებზე.

ექსპერტის თქმით, ეს ტექნოლოგიური უპირატესობა თავს იჩენს უკრაინული კონტრშეტევის დროს, რომელიც, მისივე პროგნოზით, აპრილის შუა რიცხვებში დაიწყება.