ღაზის სექტორში ისრაელის სამხედრო ოპერაციის შედეგად ტელეკომპანია „ალ-ჯაზირას“ ჟურნალისტი დაიღუპა. „ალ-ჯაზირას“ ინფორმაციით, დაბომბვის შედეგად დაღუპულია ცნობილი ჟურნალისტი ანას ალ-შარიფი და მისი ოთხი კოლეგა ოპერატორი.

გავრცელებული ცნობით, 10 აგვისტოს, გვიან საღამოს ქალაქ ღაზის ალ-შიფას საავადმყოფოს მთავარი კარიბჭის წინ განთავსებულ კარავზე თავდასხმის შედეგად შვიდი ადამიანი დაიღუპა. სწორედ იქ იმყოფებოდნენ მედიის წარმომადგენლებიც.

გარდაცვალებამდე ცოტა ხნით ადრე ანას ალ-შარიფმა სოციალურ ქსელში დაწერა, რომ ისრაელმა ღაზის აღმოსავლეთ და სამხრეთ ნაწილების ინტენსიური, კონცენტრირებული დაბომბვა დაიწყო, ასევე ცნობილი, როგორც „ცეცხლოვანი ქამრები“.

განცხადებაში „ალ ჯაზირას მედია ქსელმა“ დაგმო მკვლელობები, როგორც „პრესის თავისუფლებაზე კიდევ ერთი აშკარა და წინასწარ განზრახული თავდასხმა“.