ქალაქ ლვოვში, უკრაინის პარლამენტის ყოფილი სპიკერი, ანდრეი პარუბი მოკლეს. ინფორმაციას ამის შესახებ უკრაინული მედია ავრცელებს.

„დღეს, დაახლოებით შუადღისას, შეტყობინება შემოვიდა ლვოვის სიხოვის რაიონში სროლის შესახებ. მიღებული დაზიანებების შედეგად პირი ადგილზე გარდაიცვალა. დადგინდა, რომ დაღუპული 1971 წელს დაბადებული ცნობილი საზოგადო და პოლიტიკური მოღვაწეა“, - ნათქვამია ეროვნული პოლიციის განცხადებაში.

განცხადებაში ასევე ნათქვამია, რომ სამართალდამცველები მუშაობენ იმაზე, რომ დაადგინონ მსროლელის ვინაობა და მისი ადგილსამყოფელი.

ანდრეი პარუბი უკრაინის უმაღლეს რადას 2016-2019 წლებში ხელმძღვანელობდა. 2014 წელს ის უკრაინის ეროვნული უსაფრთხოების საბჭოს მდივნის თანამდებობას იკავებდა. მანამდე კი აქტიურად მონაწილეობდა ევრომაიდანის ორგანიზებაში.