პარტიამ „გახარია საქართველოსთვის" აჭარის უმაღლესი საბჭოს ბოიკოტი შეწყვიტა. ამის შესახებ პარტიის წევრმა, ჯემალ ანანიძემ ბრიფინგზე განაცხადა.

როგორც ანანიძემ აღნიშნა, პარტია იწყებს აქტიურ ჩართულობას ყველა საკანონმდებლო და წარმომადგენლობით ორგანოში.

„ყველასათვის ცნობილია, რომ 26 ოქტომბრის საპარლამენტო და უმაღლესი საბჭოს არჩევნების შემდეგ ჩვენმა პოლიტიკურმა გუნდმა ერთხმად მიიღო პარლამენტის და პარალელურად, უმაღლესი საბჭოს ბოიკოტის გადაწყვეტილება. თუმცა დღევანდელმა რეალობამ მკაფიოდ აჩვენა, რომ ერთი წლის წინ პოლიტიკური პროტესტის არჩეულმა ფორმამ არათუ შეაჩერა და დაასუსტა „ქართული ოცნების" ხელისუფლება, არამედ გააძლიერა იგი. უმოკლეს დროში „ოცნება" გადაიქცა თავისივე ქვეყნის პროგრესის უპირველეს შემაფერხებელ შიდა ბოროტ ძალად. ბოიკოტი დამაზიანებელი აღმოჩნდა არა მხოლოდ სახელმწიფოსთვის, არამედ პოლიტიკური პარტიებისთვისაც, რითიც ისარგებლა „ქართულმა ოცნებამ" და საზოგადოების ორად გაყოფილი აზრის გაძლიერებით მშვიდობიანი პროტესტის გამომხატველი მოსახლეობა მიიყვანა 4 ოქტომბრის პროვოკაციამდე.

ქვეყანაში შექმნილ დღევანდელ ვითარებაში გარკვეულწილად ჩვენი პასუხისმგებლობაცაა, რადგან ერთი წლის წინ ჩვენ ვერ შევძელით საზოგადოებისა და პოლიტიკური სპექტრის დარწმუნება, რომ სადეპუტატო მანდატების გაუქმება იქნებოდა შეცდომა, რასაც მოჰყვებოდა და მოჰყვა კიდეც  ქვეყანაში უკიდურესად დამძიმებული პოლიტიკური თუ სოციალური მდგომარეობა", - აღნიშნა ანანიძემ.

მისივე თქმით, ოპოზიციის პოლიტიკური პროცესებიდან გაქრობამ ხალხი დაუცველი დატოვა.

„თვითმმართველობის არჩევნების დღეს, 4 ოქტომბერს დაანონსებულმა და განხორციელებულმა ყოვლად გაუმართლებელმა, უპასუხისმგებლო და პროვოკაციულმა პროცესებმა სიტუაცია იმდენად უკიდურესად დაამძიმა ქვეყანაში, რომ დააზიანა და დააპირისპირა ისედაც დასუსტებული ოპოზიციური სპექტრი, რითიც „ოცნებას" მიეცა საბაბი, საკუთარ მცირერიცხოვან მომხრეებში გაემართლებინა თავისი ავტორიტარიზმის გაძლიერება.

დღეს უკვე ყველასათვის ნათელია, რომ ოპოზიციის პოლიტიკური პროცესებიდან გაქრობამ ხალხი დატოვა დაუცველი რეჟიმის პირისპირ, რომელიც თავისი სახელისუფლებო ძალაუფლების შესანარჩუნებლად არ ერიდება განსხვავებული აზრის დევნას, კრიტიკული აზრის გამომხატველთა დაპატიმრებებს, ყველა განსხვავებული აზრის მქონე პირთა ქვეყნის წინაშე დამნაშავეებად გამოცხადებას და დასჯას. სწორედ ამიტომ ჩვენი მთავარი მიზანია საკანონმდებლო ორგანოებიდან ბრძოლა განსხვავებული, ჯანსაღი და პროგრესული აზრის გადარჩენისთვის", - განაცხადა ანანიძემ.

ანანიძის თქმით, აჭარის უმაღლესი საბჭოს ტრიბუნის გამოყენებაზე უარის თქმა შეცდომა და დანაშაულია ქვეყნის წინაშე.

„4 ოქტომბრის შემდგომ შექმნილმა ვითარებამ კიდევ ერთხელ დაგვარწმუნა, რომ პარლამენტისა და უმაღლესი საბჭოს ტრიბუნის არგამოყენება, განსაკუთრებით ამ რთულ პერიოდში, არა მხოლოდ შეცდომა, არამედ დანაშაულია ქვეყნისა და ხალხის წინაშე. გამუდმებით ვამტკიცებდით, რომ მოსახლეობის მხრიდან ნდობაშემცირებულ ხელისუფლებასთან ბრძოლის ერთადერთი კანონიერი გზაა არჩევნები და შედეგად მიღებული მანდატების აქტიურად გამოყენება ქვეყნის თუ მოსახლეობის უკეთესი მომავლისათვის.

ჩვენი დღევანდელი განცხადებით კიდევ ერთხელ ვადასტურებთ, რომ სასიცოცხლოდ მნიშვნელოვნად მიგვაჩნია როგორც პარლამენტსა თუ საკრებულოებში, ასევე აჭარის უმაღლეს საბჭოში, ისმოდეს საქართველოს მოქალაქეების, ჩვენი რეგიონის მოსახლეობის განსხვავებული აზრი. სწორედ ამიტომაც გავდივართ ბოიკოტის რეჟიმიდან და ვიწყებთ აქტიურ ჩართულობას ყველა საკანონმდებლო, წარმომადგენლობით ორგანოებში, რათა ეტაპობრივად ქვეყანა დავაბრუნოთ კონსტიტუციური და დემოკრატიული განვითარების ჩარჩოში", - განაცხადა ჯემალ ანანიძემ.