უკრაინის პრეზიდენტმა ვოლოდიმირ ზელენსკიმ ცეცხლის შეწყვეტის მზადყოფნის შესახებ განაცხადა. შვედეთის პრემიერ-მინისტრ ულფ კრისტერსონთან ერთად გამართულ ერთობლივ პრესკონფერენციაზე მან აღნიშნა, რომ უკრაინა მზადაა რუსეთთან მოლაპარაკებებისთვის, მაგრამ არა უკრაინის ტერიტორიების დათმობის პირობით.

„უკრაინა მზადაა, დიპლომატიაზე გადავიდეს. ჩვენ მხარს ვუჭერთ ცეცხლის შეწყვეტას. ჩვენ მზად ვართ დიპლომატიისთვის, მაგრამ არა იმ პირობით, რომ რომელიმე ტერიტორიიდან გავიდეთ და აგრესორს ჩვენი მიწა, ჩვენი ტერიტორიები გადავცეთ. რა თქმა უნდა, საქმე კილომეტრებს არ ეხება. საქმე ჩვენს სახლებს, ჩვენს ხალხს, ჩვენს ისტორიას, ჩვენს იდენტობას ეხება. საქმე ჩვენს ტერიტორიულ მთლიანობას ეხება“, - ხაზგასმით აღნიშნა ზელენსკიმ.

სახელმწიფოს მეთაურმა დასძინა, რომ ის ამის შესახებ აშშ-ის პრეზიდენტ დონალდ ტრამპს ესაუბრა, თუმცა საქმე იმაშია, რომ რუსეთმა დიპლომატიისთვის მზადყოფნა არ გამოავლინა.

ზელენსკიმ ხაზგასმით აღნიშნა, რომ ყველა დიპლომატიური ძალისხმევა, რომელსაც რუსეთი თავისი ზარებითა თუ შეტყობინებებით აჩვენებს, მიმართულია იმისკენ, რომ აშშ-ისა და ევროპის მკაცრი გადაწყვეტილებები გადადოს. კერძოდ, რუსეთი ძალიან ერიდება ახალი სანქციების დაწესებას, ან უკრაინისთვის „ტომაჰავკის“ ტიპის ფრთოსანი რაკეტების მიყიდვას.

„ისინი ამას იმიტომ აჭიანურებენ, რომ დიპლომატიისთვის მზად არიან... ისინი აჭიანურებენ უპირობო გადაწყვეტილებებს, რომლებიც რუსეთზე ზეწოლას ახდენს. როდესაც რუსეთი დიპლომატიისთვის მზად იქნება, ვნახოთ“, - განაცხადა ზელენსკიმ. 

როგორც სახელმწიფოს მეთაურმა აღნიშნა, ამ კვირაში დიდ ბრიტანეთში „მსურველთა კოალიციის“ ძალიან მნიშვნელოვანი შეხვედრა გაიმართება.

„ჩვენმა „მსურველთა კოალიციამ“ რაც შეიძლება მალე უნდა დაასრულოს უკრაინის უსაფრთხოების გარანტიების შემუშავება. ეს ამ ომის დასრულების მნიშვნელოვანი ელემენტია, რადგან საკმარისი არ არის რუსეთის აგრესიის დასრულება, პუტინის შეჩერება და პირადად მისი შეჩერება, რადგან მისი პირადი ნება და სურვილია უკრაინის, უკრაინის დამოუკიდებლობის განადგურება და ჩვენი მიტაცება. და ეს საკმარისი არ არის. ჩვენ ნებისმიერ შემთხვევაში და ნებისმიერ ფორმატში უნდა ავიცილოთ თავიდან რუსეთის აგრესიის გამეორება. სწორედ ამიტომ გვჭირდება უსაფრთხოების გარანტიები“, - აღნიშნა მან.

ზელენსკის თქმით, მან ტრამპთან ორი საათის განმავლობაში გარკვეულ ნაბიჯებთან დაკავშირებით ისაუბრა.