არ ვიცით, რა შეიძლება იყოს „ოცნების" ლოგიკა. მათი ლოგიკის ამოხსნა, ფაქტობრივად, შეუძლებელია. ჩვენთვის გაუგებარია ყველა არგუმენტი, რომელიც პაპუაშვილისგან მოვისმინეთ. განსაკუთრებით ეს ეხება „ლელოს". საერთოდ ვერ ვხსნით, რატომ მოხვდა „ლელო" ამ ე.წ. ასაკრძალ პარტიებს შორის. ჩვენი მხარდაჭერა „ლელოს", - ამის შესახებ „გახარია საქართველოსთვის" წევრმა, გიორგი შარაშიძემ განაცხადა.
შარაშიძეს „ქართული ოცნების" მიერ წარდგენილ საკონსტიტუციო სარჩელზე დაუსვეს კითხვა.
„რაც შეეხება „ნაციონალურ მოძრაობასა" და მის განაყოფებს, იცით ჩვენი პოზიცია, რომ პორტია თუ იმსახურებს დამარცხებას, პირველ რიგში, ეს პარტია არჩევნებით და პოლიტიკური გზებით უნდა დაამარცხო. აკრძალვა არცერთ შემთხვევაში არ ჩაითვლება კონსტიტუციურ ნაბიჯად. არის მეორე მხარეც, რომ ეს კიდევ ერთხელ ემსგავსება „ოცნებასა" და „ნაციონალურ მოძრაობას" შორის რადიკალიზაციისა და დაპირისპირების ახალ ფაზას. ვფიქრობთ, რეალურად, „ოცნებამ" სამართლებრივად რომც აკრძალოს „ახლებისა" და „ნაციონალური მოძრაობის" კოალიცია, დარწმუნებული ვარ, „ნაციონალური მოძრაობის", როგორც შიშის ფაქტორი, არასდროს გაქრება და ამას, პირველ რიგში, „ოცნება" შეუწყობს ხელს. კარგად იცით, რომ „ოცნება" ყველა არჩევნებს იგებს „ნაციონალური მოძრაობის" შიშის ფაქტორის საკმაოდ ეფექტურად გამოყენებით. მალე გამოჩნდება, რამდენად არის ეს ყველაფერი რეალობა და რამდენად ემსახურება რეალურად, „ნაცმოძრაობასთან" ბრძოლას, არის თუ არა ეს მორიგი ფეიკკამპანია. ბევრი რამ შეიძლება ვიფიქროთ. შეიძლება, ვიფიქროთ, რომ პროცესი ბოლომდე არ მივიდეს. სრულიად ბუნდოვანი პუნქტით, რაც არის ე.წ. მემკვიდრე პარტიასთან დაკავშირებით, „ოცნება" რაღაც ბერკეტებს იტოვებს - როცა უნდა, დაადასტურებს, რომ ეს მემკვიდრე პარტიაა, ან უარყოფს. „ოცნება" ამას სათავისოდ გამოიყენებს. ერთია სამართლებრივი მხარე, მაგრამ „ოცნება" არ და ვერ შეეგუება პოლიტიკური სივრციდან „ნაციონალური მოძრაობის" შიშის ფაქტორის გაქრობას. დღეს თუ ვინმეს სჭირდება „ნაციონალური მოძრაობა", როგორც „ოცნების" უარესი ალტერნატივა, პირველ რიგში, არის „ოცნება", - განაცხადა შარაშიძემ.
ამასთან, როგორც შარაშიძემ აღნიშნა, რთულია ლოგიკის დადგენა, პარტია „გახარია საქართველოსთვის" რატომ არ აღმოჩნდა „ქართული ოცნების" საკონსტიტუციო სარჩელში.
„ჩვენთვის რთულია, ამოვხსნათ „ქართული ოცნების" ლოგიკა, რატომ აღმოვჩნდით ამ სიის მიღმა, რომლის პარტიის ლიდერიც საგამოძიებო კომისიაზე ორჯერ დაიბარეს. ჩვენ ერთი რამ ვიცით, გადაწყვეტილება, რაც მივიღეთ, არის ერთადერთი სწორი გადაწყვეტილება, რათა პოლიტიკური პროცესი გადავარჩინოთ. ჩვენ ეს გამოწვევა მივიღეთ, რათა საქართველოს პარლამენტში, „ოცნების" შიგნიდან გავაგრძელოთ ბრძოლა. ნახავთ, რომ ეს იქნება მწვავე და ძალიან პრინციპული ბრძოლა „ოცნების" მოძალადე რეჟიმის წინააღმდეგ", - განაცხადა გიორგი შარაშიძემ.
საქართველოს პარლამენტის თავმჯდომარემ, შალვა პაპუაშვილმა წარადგინა კონსტიტუციური სარჩელი, რომელშიც მოთხოვნილია „ნაციონალური მოძრაობის", „კოალიცია ცვლილებისთვის" და „ძლიერი საქართველო - ლელოს" საქმიანობის არაკონსტიტუციურად ცნობა და აკრძალვა.