საქართველოს პარლამენტის თავმჯდომარის, შალვა პაპუაშვილის შეფასებით, მამუკა ხაზარაძე ყალბ პროპაგანდას და ქსენოფობიური სტილის კამპანიას ეწევა.

პაპუაშვილი გამოეხმაურა „ლელოს" ლიდერის, მამუკა ხაზარაძის იმ განცხადებას, სადაც ხაზარაძე აღნიშნავს: „კატეგორიული წინააღმდეგი ვართ, საქართველოში ორი ანკლავი გაშენდეს, კრწანისის ტყე-პარკსა და გონიოში არაბების მიერ ქალაქების აშენება ეწინააღმდეგება ეროვნულ ინტერესებს".

შალვა პაპუაშვილის განმარტებით, „ლელოს" ასეთივე პროპაგანდა ჰქონდა „ჰუალინგ პლაზასთან" დაკავშირებითაც.

შალვა პაპუაშვილის თქმით, EMAAR ჯგუფის 6,5-მილიარდ დოლარიანი ინვესტიცია გულისხმობს ეკონომიკის ზრდას და სამუშაო ადგილების შექმნას.

„რაც შეეხება ამ ორ თაღლითს, ეს ადამიანები საქართველოს სახელმწიფო ბიუჯეტიდან მილიარდ-ნახევარს ითხოვდნენ. თან იმასაც ბედავენ, რომ პოლიტიკაში იყვნენ და ხალხს ხმის მიცემა სთხოვონ. ინვესტიციების მიმართ მათი დამოკიდებულება ანაკლიაში ვნახეთ. პროექტი აბსოლუტურად ჩააფლავეს, რომლის შესასრულებლად ხელისუფლებამ ყველა პირობა შეუქმნა - კონსტიტუციაში ჩანაწერის გაკეთებიდან დაწყებული, ხელშეკრულებების გადავადებებით დასრულებული. ბოლოს იქამდე მივიდნენ, საქართველოს მოქალაქეებს ხაზარაძე-ჯაფარიძისთვის დივიდენდები უნდა გადაგვეხადა, რომ წაგებაში არ წასულიყვნენ. ეს რომ ვერ მიიღეს მოქალაქეებისგან, მილიარდ-ნახევარს ითხოვდნენ. წააგეს არბიტრაჟში, მათ შორის 65 მილიონს ითხოვდნენ ხელისუფლებისგან, ესეც წააგეს და, საბოლოო ჯამში, 7 მილიონზე მეტი აქვთ ბიუჯეტში გადასახდელი. ხაზარაძე ჩივის, რომ შეიძლება, აშენდეს უძრავი ქონება, ბინები, რომლებიც შესაძლოა, უცხოელებმა იყიდონ. ასეთივე პროპაგანდა ჰქონდათ ვარკეთილში, „ჰუალინგ პლაზაზე", თითქოს იქ ნახევარი ჩინეთი ჩამოსახლდებოდა, მაგრამ გაიარონ და ნახონ, იმ ბინებში ვინ ცხოვრობს. ეს ზუსტად იგივე, იაფი, ქსენოფობიური სტილის კამპანიაა, რომელსაც ის ადამიანი აწარმოებს, რომელსაც საკუთარი ბინა უცხოელისთვის აქვს მიქირავებული - შუა ცენტრში, ლესელიძეზე. როგორც იცით, ბინა გერმანიის ელჩისთვის აქვს მიქირავებული. ახლა, როცა ყალბ პროპაგანდას ეწევა, თან იაფფასიანი ქსენოფობიით, ეს არასერიოზულია. ეს მნიშვნელოვანი ინვესტიციაა, საუბარია 6,5 მილიარდ დოლარზე. „ნაციონალური მოძრაობის" მმართველობის დროს, ჯამში, მთლიანად არ შემოსულა ასეთი ინვესტიცია, როცა ახლა ქვეყანაში ეს ინვესტიცია მხოლოდ ერთ კომპანიას აქვს. ეს გულისხმობს ეკონომიკის ზრდას, სამუშაო ადგილების შექმნას. ასეთი პატრიოტი თუა და გულში მჯიღს იცემს, მაშინ გერმანიის ელჩთან ხელშეკრულება შეწყვიტოს და ან თვითონ იცხოვროს იქ, ან ქართველს მიაქირაოს", - განაცხადა შალვა პაპუაშვილმა.