დონალდ ტრამპის ადმინისტრაცია აძლიერებს ძალისხმევას უკრაინისთვის ახალი სამშვიდობო შეთანხმების მისაღწევად - და კვირას ამერიკელი წარმომადგენლები ჟენევაში ჩავლენ პრეზიდენტ ვოლოდიმირ ზელენსკისთან შესახვედრად. გეგმის მწვავე კრიტიკის მიუხედავად, ვაშინგტონი ამტკიცებს, რომ 28-პუნქტიანი დოკუმენტი ულტიმატუმი არ არის და მისი შეცვლა შესაძლებელია, - წერს საერთაშორისო ამბების მიმომხილველი დევიდ იგნატიუსი Washington Post-ისთვის გამოქვეყნებულ სტატიაში.

„უსაფრთხოების გარანტიები ჯერ კიდევ საკმარისად ძლიერი არ არის“, - აღიარებენ ამერიკელი ოფიციალური პირები, რომლებსაც მოლაპარაკებების შესახებ ინფორმაცია მიაწოდეს.

ამერიკელები კიევსა და ევროპას არწმუნებენ, რომ ტრამპის ინიციატივა პრორუსული არ არის. ისინი აცხადებენ, რომ აშშ მზადაა გააძლიეროს ძალები და მშვიდობის დამყარების შემთხვევაში უკრაინაში „ტომაჰავკის“ ტიპის ფრთოსანი რაკეტების გადატანის შესაძლებლობასაც კი განიხილავს.

მოლაპარაკებებში მონაწილე ორი მაღალი თანამდებობის პირის თქმით, პროექტი მოიცავს შემდეგ ძირითად დებულებებს:

• უკრაინის არმიის რაოდენობის შესაძლო შეზღუდვა 600 000 ჯარისკაცამდე - საკითხი, რომლის განსახილველადაც აშშ უკვე მზადაა
• მოთხოვნა, რომ უკრაინამ გაიყვანოს ჯარები დონეცკის რეგიონის დაახლოებით 25%-დან, რომელსაც ამჟამად ის აკონტროლებს, რუსეთის მთავარი სურვილია
• აშშ-სა და მოკავშირეების მხარდაჭერით აკრძალვის ზონის დემილიტარიზაცია და ახალი „უსაფრთხოების კედლის“ მშენებლობა
• შეთანხმების ხელმოწერიდან 100 დღის განმავლობაში უკრაინაში არჩევნების ჩატარება
• ომის შემდგომი ამნისტია კიევის მოთხოვნაა, დაიცვას მაღალი თანამდებობის პირები ანტიკორუფციული გამოძიებების კონტექსტში

„უკრაინის სუვერენიტეტს არასდროს არ შეიძლება საფრთხე შეექმნას... ჩვენ არ გვინდა უკრაინის დაშლა“, - განაცხადა ერთ-ერთმა მთავარმა ჩინოვნიკმა.

ვაშინგტონი მიიჩნევს, რომ დონეცკის რეგიონში დანაკარგების, კიევში კორუფციული სკანდალისა და პოლიტიკური არასტაბილურობის გამო, უკრაინა ახალ სახიფათო მომენტში აღმოჩნდა.

ამავდროულად, აშშ-ის შეფასებით, რუსეთი განიცდის გაზრდილ ეკონომიკურ ზეწოლას და შესაძლოა, დაინტერესებული იყოს ომის დასრულებით, დონბასზე სრული კონტროლისთვის კიდევ ორი ​​წლის ბრძოლის ნაცვლად.

თურქეთი აქტიურად ასრულებს შუამავლის როლს ახალ მოლაპარაკებებში, ასევე, ღაზას საკითხთან დაკავშირებულ მოლაპარაკებებში, რომელსაც ტრამპი თავის ერთ-ერთ წარმატებად მიიჩნევს.

აშშ-ის მაღალჩინოსნებს შორის არსებული წყაროების ცნობით, ფლორიდაში გამართულ შეხვედრაზე უკრაინის ეროვნული უშიშროების საბჭოს მდივანმა რუსტემ უმეროვმა, აღიარა კიევის მზადყოფნა, დონბასის საკითხთან დაკავშირებით კომპრომისზე წავიდეს და არმიის რაოდენობა შეზღუდოს. ამან უკრაინაში მკვეთრი რეაქცია გამოიწვია და ახლა ვაშინგტონი მიანიშნებს, რომ მზადაა ეს პუნქტები შეცვალოს.

თუმცა, მთავარი გადაწყვეტილება ზელენსკის რჩება. იგნატიუსი წერს:

„ზელენსკი ახლა თავისი პრეზიდენტობის ყველაზე მტკივნეული არჩევანის წინაშე დგას. თუ ის დონეცკის დანებებას დათანხმდება, ზოგიერთი უკრაინელი მას არასდროს აპატიებს. თუ ის უარს იტყვის, ეს ტრაგიკული ომი გაგრძელდება“