ეკონომიკისა და მდგრადი განვითარების მინისტრის მოადგილის ვახტანგ ცინცაძის შეფასებით, კომპანია „იგლ ჰილსის" მიერ საქართველოში 6.6 მილიარდი აშშ დოლარის საინვესტიციო პროექტის განხორციელებას ქვეყნის ეკონომიკისთვის ტრანსფორმაციული ხასიათი ექნება - მათ შორის, დაჩქარდება ეკონომიკური ზრდა და შეიქმნება ახალი, მაღალი ღირებულების მქონე სამუშაო ადგილები.

„იგლ ჰილსის" პროექტს მნიშვნელოვანი როლი აქვს პირდაპირი უცხოური ინვესტიციების კუთხით არსებული მოლოდინების გაუმჯობესებაზე, რასაც სარეიტინგო კომპანია Fitch Ratings-ის მიერ საქართველოს სუვერენული საკრედიტო რეიტინგის პერსპექტივის ზრდაც ადასტურებს. ამასთან, ამ მასშტაბის პროექტის განხორციელება მნიშვნელოვანია გზავნილია სხვა, ადგილობრივი თუ საერთაშორისო საინვესტიციო კომპანიებისადმი", - განაცხადა ეკონომიკის მინისტრის მოადგილემ.

ვახტანგ ცინცაძე ხაზს უსვამს, რომ „იგლ ჰილსის" მიერ დედაქალაქსა და გონიოში თანამედროვე, მაღალი ხარისხის და სტანდარტების შესაბამისი პროექტები განხორციელდება, რომელიც ქვეყანაში ინვესტიციების და ფულადი რესურსების შემოტანის გარდა, ასევე უზრუნველყოფს ცოდნის, ტექნოლოგიებისა და ახალი სტანდარტების დამკვიდრებას.

„გარდა იმისა, რომ ქვეყანაში შეიქმნება ახალი სამუშაო ადგილები, ასევე გაჩნდება ახალი სივრცეები და მიზიდულობის ცენტრები, ეს ყველაფერი კი ხელს შეუწყობს საქართველოში გაცილებით მაღალმხარჯველები ტურისტების შემოდინებას და, საბოლოო ჯამში, ქვეყნის ეკონომიკა თვისობრივად სხვა დონეზე გადავა", - აღნიშნა მინისტრის მოადგილემ.