ეკონომიკისა და მდგრადი განვითარების მინისტრის მოადგილის, ვახტანგ ცინცაძის შეფასებით, ეკონომიკური ზრდის მაღალი ტემპი ოქტომბრის თვეშიც შენარჩუნებულია, ზრდამ 6% შეადგინა.

რაც შეეხება იანვარ-ოქტომბრის პერიოდს, მისი თქმით, 10 თვის საშუალო ეკონომიკური მაჩვენებელი 7.6%-ით განისაზღვრა.

ვახტანგ ცინცაძე ხაზს უსვამს, რომ ეკონომიკური ზრდა, ისევე როგორც გასულ თვეებში, ოქტომბრის თვეშიც სექტორულ ჭრილში საკმაოდ დივერსიფიცირებული იყო.

„ოქტომბრის თვის ეკონომიკურ ზრდაში პოზიტიური წვლილი შეიტანა ინფორმაციისა და კომუნიკაციის, ტრანსპორტისა და დასაწყობების, ასევე დამამუშავებელი მრეწველობის, ჯანდაცვის, საფინანსო და სადაზღვევო საქმიანობების, უძრავ ქონებასთან დაკავშირებული საქმიანობების და სხვა სექტორებმა. რაც შეეხება იანვარ-ოქტომბრის პერიოდს, მაღალი ეკონომიკური ზრდის ხელშემწყობი საგარეო ვაჭრობის მიმართულებით დაფიქსირებული პოზიტიური ტენდენციები იყო, ასევე რეკორდული მაჩვენებელები გვაქვს ტურიზმიდან მიღებული შემოსავლების კუთხით", - განაცხადა მინისტრის მოადგილემ.

აღსანიშნავია, რომ 2025 წლის ოქტომბერში დღგ-ის გადამხდელ საწარმოთა ბრუნვა, წინა წლის შესაბამისი თვის მაჩვენებელთან შედარებით, 7.0%-ით გაიზარდა, ახლად დარეგისტრირებულ საწარმოთა რაოდენობამ კი 6,075 ერთეული შეადგინა. ამასთან, 2025 წლის იანვარ-ოქტომბრის პერიოდში ექსპორტი 6.8 %-ით გაიზარდა და 5.8 მილიარდი აშშ დოლარი შეადგინა, ხოლო ადგილობრივი ექსპორტის (ექსპორტი რეექსპორტის გამორიცხვით) ზრდა 4.6%-ს გაუტოლდა.

„საბოლოო ჯამში, ჩვენი მიზანია, რომ ქვეყანაში შევინარჩუნოთ მაღალი ეკონომიკური ზრდის დინამიკა, ამას უზრუნველყოფს ის სწორი და თანმიმდევრული პოლიტიკა, რასაც ეკონომიკური ზრდის და ამ ტემპების შენარჩუნების კუთხით საქართველოს მთავრობა ახორციელებს", - აღნიშნა ვახტანგ ცინცაძემ.

ინფორამციას ეკონომიკის სამინისტრო ავრცელებს.