შარშან ვიხილეთ გარედან მხარდაჭერილი, წაქეზებული ძალადობა სახელმწიფო დაწესებულებების, ქვეყნის წინააღმდეგ, - ამის შესახებ პარლამენტის თავმჯდომარემ, შალვა პაპაუშვილმა განაცხადა.

მისი თქმით, შარშან, ნოემბერში ჩამოსული იყო შვიდი ქვეყნის კომიტეტების თავმჯდომარეები, მათ შორის შვედეთის ხელისუფლების წარმომადგენელი, რომელმაც ხალხს „მაიდნისკენ" მოუწოდა, რამდენიმე დღეში კი რადიკალურმა ოპოზიციამ ეს მოწოდება შეუსრულა, გამოვიდნენ და პარლამენტს ცეცხლს უკიდებდნენ.

„შარშან პარლამენტის შენობაში დაიწვა რამდენიმე ოთახი, შენობაზე ჩამტვრეული იყო ყველა შუშა, პიროტექნიკის გამოყენება იყო, ასზე მეტი პოლიციელი დაშავდა, წვავდნენ პოლიციის ტექნიკას. ამ ყველაფერს უყურებდა ბრიუსელი და ტაშს უკრავდა. ტაში დაუკრეს ძალადობას. დღემდე არც ევროკავშირის ელჩს, არც სხვა რომელიმე ხმამაღლა მოსაუბრე ელჩს, არც ევროკომისიას, ევროპარლამენტს, რომელიმე ხმამაღლა მოსაუბრე ევროპელს, დღემდე არ დაუგმიათ ის ძალადობა, რომელიც მათი დაფინანსებული „ენეჯეოებისგან", პოლიტიკოსებისგან ვიხილეთ. სოფიაში გვახსოვს, აქციის მონაწილეებმა ცეცხლი დაანთეს პარლამენტის ოფისთან, ამაზე ევროკავშირში ამბავი ჰქონდათ ატეხილი, ეს როგორ მოხდაო და აქ მათი დაფინანსებული ადამიანები წვავდნენ პარლამენტის შენობას და არათუ არ დაგმეს, ფული დაუმატეს. ეს ძალადობა იყო ბრიუსელის ბიუროკრატებისგან წაქეზებული, რამაც შემდეგი ძალადობები მოგვიტანა", - განაცხადა შალვა პაპუაშვილმა.

მისი თქმით, ძალადობას სჭირდებოდა პასუხი.

„გახსოვთ, ე.წ. მოლოტოვის კოქტეილები აღმოჩნდა პარტიების ოფისებში, მაგალითად, „დროას", მათ შორის ქალბატონი ხოშტარიას განცხადებები იყო, რომ დიახ, ყიდულობდა მაშხალებს. გახსოვთ, როგორ იხარჯებოდა ევროკავშირის ფული, რომ ჯარიმები გადაეხადათ. მახსოვს „ისფედის" დღევანდელმა ხელმძღვანელმა აღიარა, რომ ევროკავშირის ფულით ყიდულობდნენ აღჭურვილობას და აქციის მონაწილეებს აძლევდნენ პოლიციისთვის წინააღმდეგობის გასაწევად, აირწინაღებს ყიდულობდნენ და სხვა. დასკვნა, რომელზეც ყველა ვთანხმდებით, რომ შარშან ძალადობრივი აქციების მონაწილეების არცერთი ქმედება არ დაუგმია ევროკავშირს და ბრიუსელს, არათუ დაგმეს მათ მიერ დაფინანსებული „ენჯეოების" მხრიდან წამოსული ძალადობა, არამედ ფული დაუმატეს. ბრიუსელმა მოიწონა, წაახალისა, ტაში დაუკრა მოძალადეებს და ფული დაუმატა. ეს ხდებოდა პირდაპირ გარედან, ბრიუსელიდან ზეპირი და სიტყვიერი მხარდაჭერით. გვესმოდა განცხადებები: მიდით, ქართველებო, თქვენს გვერდში ვართ", - განაცხადა პარლამენტის თავმჯდომარემ.

მისი თქმით, ძალადობას სჭირდებოდა გამკლავება და მოძალადეების დაშოშმინება.

„ასეთ დროს, რა თქმა უნდა, არის ექსცესები, როდესაც შეიძლება, მოხდეს ძალის გადაჭარბება ან გარკვეული დაზიანებები, ამ ექსცესებს სჭირდება გამოძიება. ერთი წელი გავიდა, რაც ე.წ. მოლოტოვის კოქტეილებს ისროდნენ და ევროკავშირის ელჩს დღემდე  ერთი სიტყვა არ უთქვამს, როდესაც მისი დაფინანსებული ადამიანები აირწინაღებით დარბოდნენ პოლიციის წინააღმდეგ, მისი დაფინანსებული ადამიანები ყელყელაობენ, რომ პოლიციელებს შაშხანებს ესროდნენ. არავის მიეცემა შესაძლებლობა, ძალადობა აქციონ ქართული კულტურის ნაწილად. ყველამ დაიტოვოს ეს ძალადობა ბერლინში, პარიზში, თავის დედაქალაქში. ქართული კულტურის ნაწილად ძალადობრივი პროტესტი არ იქცევა. ეს არის ის ევროპა, რომელიც ზოგიერთს უნდა, რომ შემოიტანოს, თავისთვის დაიტოვონ კარგი რაღაცები და ჩვენ ეს ყველაფერი ევროპად შემოგვასაღონ", - განაცხადა შალვა პაპუაშვილმა.