გამორიცხულია, მთაწმინდაზე მცხოვრები ადამიანი მიდიოდეს ღამის საათებში სასამართლოსთან და უკიდებდეს ცეცხლს ან ცეცხლის წაკიდების მცდელობა ჰქონდეს, - ამის შესახებ ალეკო ელისაშვილის ადვოკატმა, გიორგი რეხვიაშვილმა განაცხადა.

მისივე თქმით, დამატებით ინფორმაციას ალეკო ელისაშვილთან საუბრის შემდეგ გაავრცელებს.

„ახლა გავიგე ინფორმაცია შინაგან საქმეთა სამინისტროს მიერ გავრცელებული კადრების ნახვის შემდგომ, სადაც ჩანს, რომ ელისაშვილს აქვს ფიზიკური დაზიანებები მიყენებული. ჩემთვის დილით გახდა ცნობილი, რომ ის იყო დაკავებული სისხლის სამართლის საქმიდან გამომდინარე. თუმცა მე ჯერჯერობით არ მომეცა საშუალება, შევხვედროდი პირადად და გავსაუბრებოდი, მენახა მისი ფიზიკური დაზიანებები, კონკრეტულად რა მუხლს ედავებიან. ფაქტია, რომ კადრებში ჩანს იქ ბენზინი, ჩაქუჩი, სანთებელა. ეს აშკარად ჰგავს „ქართული ოცნების" მიერ დაგეგმილ რაღაცა სპეცოპერაციას. ჩვენ არაერთი საქმე გვინახავს ალეკო ელისაშვილის მიმართ დაწყებული, გვახსოვს ალი ბაბაევის საქმეც, რომელიც ერთი წლის წინ იყო ზუსტად, თუმცა მტკიცებულებების არქონის გამო დღემდე გრძელდება, ვერ უმტკიცებენ დანაშაულს. ამიტომ ვვარაუდობ, რომ დასჭირდათ ახალი საქმე, ახალი მტკიცებულებების შეგროვება, რომ ეს აქტიური პოლიტიკოსი რაღაცა გზით გააჩერონ. ჩემი აზრით, ეს არის პოლიტიკური დევნა, არანაირ დანაშაულს აქ ადგილი არ აქვს. გამორიცხულია, მთაწმინდაზე მცხოვრები ადამიანი მიდიოდეს ღამის საათებში სასამართლოსთან და უკიდებდეს ცეცხლს ან ცეცხლის წაკიდების მცდელობა ჰქონდეს. ბევრი სახელმწიფო სტრუქტურის შენობა არსებობს მის სახლთან ახლოს, მსგავსი დანაშაულის ჩადენის სურვილი რომ ჰქონოდა, შეეძლო სახლთან ახლოს განეხორციელებინა და არა ამხელა მანძილზე. აბსურდულია ჩვენთვის, ამ შემთხვევაში დაცვის მხარისთვის, და უფრო დამატებით ინფორმაციას მოგაწვდით მას შემდეგ, რაც გადაიყვანენ უკვე იზოლატორში, შევხვდები, გავესაუბრები და გამოსვლის მერე მოგაწვდით დეტალურ ინფორმაციას.

არ ვიცი, რა გახდა ფიზიკური დაზიანებების მიზეზი. დაკავების მომენტში იყო ცემის ფაქტი თუ დაკავების შემდგომ, არ ვიცი. შეხვედრის შემდგომ მექნება ინფორმაცია და ამასაც გავარკვევთ. ინფორმაცია მიწოდებული გვაქვს სახალხო დამცველის აპარტშიც და მათი წარმომადგენლებიც აპირებენ შესვლას და გამოიკვლევენ. არათუ ნახვის საშუალება არ მეძლევა, ინფორმაციაც დაახლოებით ვიცით. ვვარაუდობთ, რომ დიღმის სამმართველოში იმყოფება. ზუსტად არ გვეუბნებიან, სად არის. რეალურად გამქრალია ადამიანი, ვარაუდის დონეზე ვსაუბრობთ", - განაცხადა რეხვიაშვილმა.

შინაგან საქმეთა სამინისტროში განაცხადეს, რომ „ლელო - ძლიერი საქართველოს" წევრმა, ალეკო ელისაშვილმა დღეს, დილით, გამთენიისას თბილისის საქალაქო სასამართლოს კანცელარიის შენობის დაწვა სცადა.