ძალიან საინტერესოა, თუ ვისი მითითებით მოქმედებდა ბატონი ელისაშვილი, რომელიც ჩვეულებრივი აგენტია", - ასე გამოეხმაურა პარლამენტის ფრაქცია „ქართული ოცნების" თავმჯდომარის პირველი მოადგილე ლევან მაჭავარიანი კოალიცია „ძლიერი საქართველო - ლელოს" წევრის ალეკო ელისაშვილის დაკავებას.

„ამ ყველაფერში დამნაშავეები არიან ის ევრობიუროკრატები, ის ელჩები, რომლებიც ახალისებენ ძალადობას საქართველოში. ამ კონკრეტულ შემთხვევაში, ძალიან საინტერესოა, თუ ვისი მითითებით მოქმედებდა ბატონი ელისაშვილი, რომელიც ჩვეულებრივი აგენტია. არსებობს სამი სახის აგენტი: სასარგებლო იდიოტი, აგენტი, რომელიც ფულს იღებს და აგენტი, რომელზეც კომპრომატები გააჩნიათ. ელისაშვილი არა მგონია, რომ სასარგებლო იდიოტი იყოს - საინტერესოა, დანარჩენი ორი ოფციიდან რომელმა აიძულა იმ ნაბიჯის გადადგმა, რომელიც მან გადადგა.

ბატონი ელისაშვილი არის ჩვეულებრივი კრიმინალი და ამ ევრობიუროკრატების გათვალისწინებით, იგი იმყოფებოდა გარეთ. მას იმედი ჰქონდა, რომ რაც დღეს მოხდა, იმაზე ვერავინ ვერ წაასწრებდა, თუმცა სამართალდამცველებმა იმოქმედეს მაღალი პროფესიონალიზმით და, რა თქმა უნდა, აღკვეთეს ის ტერორისტული აქტი - პოლიტიკურად რომ შევაფასო - რომელსაც ის გეგმავდა", - აცხადებს ლევან მაჭავარიანი.

შეგახსენებთ, შინაგან საქმეთა სამინისტროს ინფორმაციით, დაკავებულია კოალიცია „ძლიერი საქართველო - ლელოს" ერთ-ერთი ლიდერი ალექსანდრე ელისაშვილი, რომელმაც დღეს დილით, გამთენიისას თბილისის საქალაქო სასამართლოს კანცელარიის შენობის დაწვა სცადა.