სახელმწიფო უსაფრთხოების სამსახური განცხადებას ავრცელებს. სუსი-ს თქმით, არასწორია მედიაპლატფორმებისა და კონკრეტული აქტივისტების მხრიდან, კამპანიურად გავრცელებული ინფორმაცია, თითქოს უკრაინის დაზვერვის მასალებით, საქართველოს ტერიტორიაზე არსებობს რუსეთის შეიარაღებული ძალების სპეციალური უსაფრთხო კომუნიკაციის ტერმინალების ქსელები.

უსაფრთხოების სამსახური აცხადებს, რომ მათ მსგავსი ინფორმაცია, უკრაინის საგარეო დაზვერვის სამსახურიდანაც არ მიუღიათ. სუს-ის მიერ გავრცელებული ტექსტის თანახმად, უკრაინის დაზვერვამ გავრცელებულ განცხადებაში მიუთითა, რომ მსგავსი რუსული ქსელები უკრაინასთან, ფრონტის ხაზზე და აფრიკის კონტინენტზე არსებობს, თუმცა ამ განცხადებასთან ერთად გამოქვეყნებულ ფოტოზე დატანილმა ლოკაციამ, უსაფრთხოების სამსახურის განცხადებით, საქართველოს შესახებ არასწორი ინტერპრეტაციის სივრცე დატოვა.

სუსი ახლა ცდილობს გაარკვიოს - რით იყო გამოწვეული განცხადებისგან განსხვავებული მასალის გავრცელება, რომელმაც საქართველოში კონკრეტულ ჯგუფებს "ცრუ და ანტისახელმწიფოებრივი კამპანიის წარმოების" საშუალება მისცა.

პარლამენტის ვიცე სპიკერის განმარტებით, ეს საქართველოს მიმართ განხორციელებული პროვოკაციაა, რომელიც შემოტევის ახალი მიმართულებაა.

"ეს არის პროვოკაცია. არ შეიძლება ამას ბოდვა ეწოდოს, რადგან ეს არის პროვოკაცია საქართველოს მიმართ. პროვოკაციები გაგრძელდება, მით უმეტეს, უკრაინაში ასეთი ანტიქართული პროპაგანდა მიმდინარეობს 2022 წლიდან, ინტენსიური და სხვადასხვა ტყუილებით დატვირთული. თითქოს საქართველოს არანაირი დახმარება არ გაუწევია, არც პოლიტიკურ ველზე არ გამოუჩენია თავი. ეს არის ახალი მიმართულება შემოტევისა, რომელიც საქართველოს მიმართ ხორციელდება", - განაცხადა გია ვოლსკიმ.