ადვოკატის ინფორმაციით, „ძლიერი საქართველო-ლელოს" ერთ-ერთ ლიდერს, ალეკო ელისაშვილს ბრალი გადაუკვალიფიცირეს და მას ტერორიზმს ედავებიან. შესაბამისი განცხადება ადვოკატმა ოპოზიციონერი პოლიტიკოსისთვის ბრალის წარდგენის შემდეგ გააკეთა.

გიორგი რეხვიაშვილის თქმით, ბრალი ითვალისწინებს 10-დან 15-წლამდე პატიმრობას.

„მოგვეცა საშუალება, რომ გავცნობოდეთ ბრალის დადგენილებას. როგორც ჩვენთვის გახდა ცნობილი, ალექსანდრე ელისაშვილს ედავებიან ტერორიზმს, ეს არის სისხლის სამართლის დანაშაული. 19- 323 პირველი ნაწილი, რაც ითვალისწინებს 10-დან 15-წლამდე პატიმრობას",- განაცხადა ადვოკატმა ჟურნალისტებს.

მისი თქმით, ალეკო ელისაშვილი "არ აღიარებს ბრალს, აღიარებს ქმედებას", ადვოკატის შეფასებით, ბრალი აბსურდულია.

"თქმა უნდა, ალექსანდრე ელისაშვილი არ აღიარებს ბრალს, აღიარებს ქმედებას, არა თუ დანაშაულს. სისხლის სამართლის დანაშაული მას არ აქვს ჩადენილი. ეს იყო პროტესტის გამოხატვის ფორმა. რაც შეეხება ტერორიზმს, არის აბსურდული.

მანამდე იყო დაწყებული 188-ე მუხლის, მეორე ნაწილის „ა" ქვეპუნქტით, რომელიც ითვალისწინებდა პატიმრობას 3-დან 6-წლამდე, თუმცა როგორც ჩანს, არ ეყოთ სანქცია და გადაუკვალიფიცირეს ტერორიზმის მუხლით", - აცხადებს ადვოკატი.

შეგახსენებთ, "ძლიერი საქართველო-ლელოს" ერთ-ერთი ლიდერი, ალეკო ელისაშვილი პოლიციამ 29 ნოემბერს დააკავა. შსს-ს ცნობით, გამთენიისას, ელისაშვილმა, შენიღბულმა, ჩაქუჩის გამოყენებით ჩაამსხვრია თბილისის საქალაქო სასამართლოს კანცელარიის შენობის გარე ფასადის მინა, შეაღწია სასამართლოს კანცელარიის შიდა სივრცეში, სადაც პერიმეტრზე ბენზინი დაასხა, მათ შორის, საკანცელარიო ნივთებზე, ტექნიკაზე, დოკუმენტაციაზე და შენობის დაწვა სცადა.

შსს-ს თანახმად, მას შემთხვევის ადგილზევე წაასწრეს სასამართლოს მანდატურის სამსახურის წარმომადგენლებმა, რომლებსაც ელისაშვილმა თანნაქონი ცეცხლსასროლი იარაღის გამოყენებით წინააღმდეგობა გაუწია და ფიზიკური შეურაცხყოფა მიაყენა. გაწეული წინააღმდეგობის მიუხედავად, ალექსანდრე ელისაშვილი მანდატურებმა ადგილზევე დააკავეს.

დაპირისპირებისას მიღებული დაზიანებებით, მანდატურის სამსახურის ერთ-ერთი წარმომადგენელი სამედიცინო კლინიკაშია გადაყვანილი. დაკავებისას, გაწეული წინააღმდეგობის გამო, დაზიანებები მიიღო ალექსანდრე ელისაშვილმაც