ნატო-ს გენერალურმა მდივანმა, მარკ რუტემ მოუწოდა ჩრდილოატლანტიკური ალიანსის წევრ ქვეყნებს, გააკეთონ მეტი, რათა მასშტაბური ომისთვის მოემზადონ. მისვე თქმით, 5-წლიან პერიოდში რუსეთი, შეიძლება, მზად იყოს ნატო-ზე თავდასხმისთვის.

„რუსეთმა ევროპაში ომი დააბრუნა და ჩვენ უნდა ვიყოთ მზად ისეთი ომისთვის, რომელიც ჩვენმა ბაბუებმა, ბებიებმა და დიდმა წინაპრებმა გადაიტანეს“, – განაცხადა რუტემ.

მისვე განცხადებით, მართალია, ალიანსის წევრებმა სამხედრო ხარჯები გაზარდეს, მაგრამ ეს საკმარისი არ არის.

„ახლა საკუთარი თავისთვის მილოცვის დრო არ არის. ვშიშობ, ბევრი ადამიანი ჩუმად თვითკმაყოფილია, ბევრი ვერ გრძნობს გადაუდებელი მოქმედების საჭიროებას, ბევრი ფიქრობს, რომ დრო ჩვენს მხარესაა. ეს ასე არ არის. მოქმედების დრო ახლაა“, – აღნიშნა ნატო-ს გენერალურმა მდივანმა.

როგორც რუტე აღნიშნავს, პუტინმა უკვე დაადასტურა ნება, გაწიროს მილიონობით მოქალაქის სიცოცხლე.

„პუტინი საკუთარი სიამაყის ფასს თავისი ხალხის სისხლით იხდის. თუ ის მზადაა, ასე გაწიროს ჩვეულებრივი რუსები, მაშინ ჩვენთვის გასაკეთებლად რისთვის იქნება მზად?“ – აღნიშნავს რუტე.

ნატო-ს გენერლური მდივნის თქმით, ჩინეთის გარეშე რუსეთი უკრაინაში ომს ვერ გააგრძელებდა.

„ჩინეთი რუსეთის მაშველი რგოლია. ჩინეთის მხარდაჭერის გარეშე რუსეთი ვერ გააგრძელებდა ომს. რუსულ უპილოტოებში და სხვა სისტემებში კრიტიკულად მნიშვნელოვანი ელექტრონული კომპონენტების 80 პროცენტი ჩინეთშია წარმოებული. როდესაც მშვიდობიანი მოქალაქეები კვდებიან კიევში ან ხარკოვში, ჩინური ტექნოლოგიები არის იმ იარაღში, რომლითაც მათ კლავენ“, – განაცხადა რუტემ.