ყაზახურმა ავიაკომპანია Scat Airlines-მა შიმკენტიდან თბილისის მიმართულებით პირველი პირდაპირი რეისი შეასრულა. ამის შესახებ ინფორმაციას საქართველოს აეროპორტების გაერთიანება ავრცელებს.

ავიაკომპანია შიმკენტსა და თბილისს შორის კვირაში ორი სიხშირით იფრენს. პირველი რეისით შიმკენტიდან თბილისის საერთაშორისო აეროპორტში და პირიქით, 166-მა მგზავრმა ისარებლა.

თბილისის საერთაშორისო აეროპორტში საინაუგურაციო ფრენასთან დაკავშირებულ ღონისძიებას საქართველოს საგარეო საქმეთა მინისტრის მოადგილე ალექსანდრე ხვთისიაშვილი, აეროპორტების გაერთიანების გენერალური დირექტორი ლევან მოსეშვილი, „ტავ ჯორჯიის" გენერალური მენეჯერი თეა ზაქარაძე, სამოქალაქო ავიაციის სააგენტოსა და ავიაკომპანიის წარმომადგენლები დაესწრნენ.

ღონისძიებაზე აღინიშნა, რომ ყაზახეთი საქართველოს სტრატეგიული პარტნიორია და ეკონომიკური და სატრანზიტო-ლოგისტიკური კუთხით მნიშვნელოვან როლს ასრულებს შუა დერეფნისთვის.

„შიმკენტი არის მეხუთე ყაზახური მიმართულება, რომელიც წლის განმავლობაში საქართველოსა და ყაზახეთს შორის სრულდება. ორ ქვეყანას შორის საჰაერო მიმოსვლას ამჟამად 3 ავიაკომპანია ასრულებს: თბილისის საერთაშორისო აეროპორტიდან - Air Astana და SCAT Airlines-ი, ხოლო ქუთაისის საერთაშორისო აეროპორტიდან - FlyArystan-ი.

საქართველოსა და ყაზახეთს შორის მგზავრთნაკადი ყოველწლიურად იზრდება. 11 თვეში საქართველოს აეროპორტები 304 ათასზე მეტ მგზავრს მოემსახურნენ, რაც გასულ წელთან შედარებით 10%-ით მეტია", - აღნიშნულია საქართველოს აეროპორტების გაერთიანების ინფორმაციაში.