კვიპროსი ევროკავშირის საბჭოს თავმჯდომარე ქვეყანა გახდა. ქვეყნის პრეზიდენტის, ნიკოს ქრისტოდულიდესის განცხადებით, მომდევნო ექვსი თვის განმავლობაში კვიპროსის თავმდჯომარეობის პრიორიტეტული საკითხი უკრაინის დახმარება იქნება.

ამასთან, კვიპროსის პრეზიდეტმა სატელეფონო საუბარი გამართა უკრაინის პრეზიდენტთან, ვოლოდიმირ ზელენსკისთან. ქრისტოდულიდესის თქმით, მათ განიხილეს ბოლო დროს განვითარებული პროცესები სამშვიდობო შეთანხმების მიღწევის ფარგლებში.

„ჩვენ ასევე განვიხილეთ გეგმა, რომელიც უკრაინისთვის კვიპროსის თავმჯდომარეობის პერიოდში დავსახეთ. უკრაინის მხარდაჭერა კვიპროსის თავმჯდომარეობის მთავარი პრიორიტეტი იქნება", - წერს კვიპროსის პრეზიდენტი.

ნიკოს ქრისტოდულიდესის განცხადებით, ის ვოლოდიმირ ზელენსკის კვიპროსში 7 იანვარს თავმჯდომარეობის გახსნის ცერემონიაზე ელოდება. თავის მხრივ, უკრაინის პრეზიდენტმა მიულოცა კვიპროსს თავმჯდომარეობის დაწყება.

„ჩვენ ვიმედოვნებთ, რომ ძლიერი გადაწყვეტილები იქნება მიღებული, რომლებიც განამტკიცებს უკრაინას და მთელ ევროპას მომდევნო ექვსი თვის განმავლობაში", - წერს ვოლოდიმირ ზელენსკი.

როგორც ვოლოდიმირ  ზელენსკიმ განმარტა, მნიშვნელოვანია, რომ უკრაინა კვიპროსის თავმჯდომარეობის ძირითად პრიორიტეტებს შორის იყოს.

„უკრაინის ევროკავშირში გაწევრიანება ჩვენთვის უსაფრთხოების გარანტიებიდან ერთ-ერთია", - აღნიშნა უკრაინის პრეზიდენტმა.