ირანის საგარეო საქმეთა მინისტრმა, აბას არაღჩიმ გერმანიის მთავრობას მოუწოდა, „ცოტაოდენი სირცხვილი იქონიონ" მას შემდეგ, რაც კანცლერმა ფრიდრიხ მერცმა განაცხადა, რომ ირანის რეჟიმი, შესაძლოა, თავის „უკანასკნელ დღეებსა და კვირებს" ითვლიდეს.

„ყველა მთავრობას შორის, გერმანიის მთავრობა ალბათ ყველაზე ნაკლებად არის უფლებამოსილი ადამიანის უფლებებზე ისაუბროს", - დაწერა არაღჩიმ პლატფორმა X-ზე. „მიზეზი მარტივია: მისმა აშკარა ორმაგმა სტანდარტებმა გასული წლების განმავლობაში ყოველგვარი ნდობის ნატამალი გაანადგურა".

მერცმა მანამდე გააკრიტიკა ირანის მთავრობა და აღნიშნა, რომ „როდესაც რეჟიმს ხელისუფლების შენარჩუნება მხოლოდ ძალადობით შეუძლია, მაშინ მან დე ფაქტო დასასრულს მიაღწია".