საერთაშორისო ავტორიტეტულმა გამოცემა „ფორბსმა"  პლატფორმა Tripadvisor-ის მონაცემებზე დაყრდნობით, 2026 წლის მსოფლიოს 10 ყველაზე ტრენდული ტურისტული მიმართულება გამოავლინა, რომელთა შორის თბილისმა მეორე ადგილი დაიკავა.

Tripadvisor-ის Travelers' Choice Awards-ის ფარგლებში გამოქვეყნებული რეიტინგი  მილიონობით მოგზაურის შეფასებებსა და მიმოხილვებს ეფუძნება, რაც მას ერთ-ერთ ყველაზე სანდო და ობიექტურ საერთაშორისო ტურისტულ ინდიკატორად აქცევს.

გამოცემა ყურადღებას ამახვილებს დედაქალაქის ისტორიულ და თანამედროვე არქიტექტურაზე,  კულტურულ დაწესებულებებსა და ხელოვნების ახალ სივრცეებზე, რომლებიც ქალაქს თანამედროვე და ამავე დროს ავთენტურ სახეს უნარჩუნებს.  სტატიაში ნახსენებია რუსთაველის გამზირი, თბილისის ოპერისა და ბალეტის თეატრი, შალვა ამირანაშვილის სახელობის ხელოვნების მუზეუმი და სხვა ღირსშესანიშნაობები.

„2026 წელი ის პერიოდია, როდესაც თბილისი საბოლოოდ იმკვიდრებს ადგილს გლობალურ ტურისტულ რუკაზე, საქართველოს დედაქალაქი შესაძლებლობებით სავსე ქალაქია, რაც ნათლად აისახება ახალგახსნილ სივრცეებში, რომლებიც მის კულტურულ და ტურისტულ ლანდშაფტს ქმნის" -აღნიშნულია სტატიაში.

თბილისთან ერთად Forbes-ისა და Tripadvisor-ის 2026 წლის ტრენდული მიმართულებების ათეულში მოხვდნენ: მადეირა (პორტუგალია), ჩიკაგო (აშშ), ქუი ნიონი (ვიეტნამი), პუერტო ესკონდიდო (მექსიკა), მილანი (იტალია), გლაზგო (შოტლანდია), აბუ-დაბი (არაბთა გაერთიანებული საამიროები), რესიფი (ბრაზილია) და სან-კარლოს-დე-ბარილოჩე (არგენტინა).

იხ. "Forbes" სტატია: https://www.forbes.com/sites/duncanmadden/2026/01/16/the-worlds-top-trending-destinations-for-2026-according-to-tripadvisor/