ლონდონის საფონდო ბირჟა საქართველოს დელეგაციას მასპინძლობს და მიესალმება 500 მილიონი აშშ დოლარის ოდენობის ხუთწლიანი ობლიგაციების განთავსებას, - ამის შესახებ ლონდონის საფონდო ბირჟის „ლინკდინის" პლატფორმაზე გამოქვეყნებულ პოსტშია ნათქვამი.

ლონდონის საფონდო ბირჟა საქართველოს ულოცავს ტრანზაქციის წარმატებულ განხორციელებას.

„ლონდონის საფონდო ბირჟა საქართველოს დელეგაციას მასპინძლობს და მიესალმება 500 მილიონი აშშ დოლარის ოდენობის ხუთწლიანი ობლიგაციების განთავსებას, რომელიც დღეიდან ლონდონის საფონდო ბირჟის მთავარ ბაზარზე ხვდება. ვულოცავთ საქართველოს და ფასიანი ქაღალდების განთავსების საკითხებზე მის მრჩევლებს ამ ტრანზაქციის წარმატებულ განხორციელებას", - ნათქვამია პოსტში.

ფინანსთა სამინისტროს ცნობით, საქართველოს მთავრობამ წარმატებით განახორციელა 500 მილიონი აშშ დოლარის ოდენობის ევროობლიგაციების გამოშვება ლონდონის საფონდო ბირჟაზე - კუპონის განაკვეთი დაფიქსირდა 5.125% ოდენობით.