მსოფლიოში ალბათ ქვეყანა არ არის, სადაც არასამთავრობო ორგანიზაციები არ არიან წარმოდგენილი, მაგრამ ის უფლებები და ძალაუფლება, რაც საქართველოში ჰქონდათ, არ იყო არსად, არ აქვთ არცერთ ქვეყანაში, - ამის შესახებ "რუსთავი 2-ის" ეთერში, გადაცემაში "დებატები", პარტია "ხალხის ძალას" თავმჯდომარე, სოზარ სუბარი საუბრობს.

სოზარ სუბარის განცხადებით, არასამთავრობო ორგანიზაციები საქართველოში, ფაქტობრივად, პოლიტიკური ძალაუფლების მქონე სუბიექტები იყვნენ.

"მსოფლიოში ალბათ ქვეყანა არ არის, სადაც არასამთავრობო ორგანიზაციები არ არიან წარმოდგენილი, მაგრამ ის უფლებები და ძალაუფლება, რაც საქართველოში ჰქონდათ, არ იყო არსად, არ აქვთ არც ერთ ქვეყანაში, ყოველ შემთხვევაში თავს, სადაც მოახვიეს - შეიძლება. ბოლო 15 წლის განმავლობაში რა ძალაუფლებაც არასამთავრობოებმა აიღეს, ეს არის უპრეცედენტო.

მაგალითად, ნებისმიერი კანონის განხილვაში რომ მონაწილეობდნენ - ეს კიდევ შეიძლება ჩავთვალოთ, რომ ლეგიტიმურად იმიტომ, რომ მოდის და როგორც ექსპერტი აზრს გიზიარებს. ვერ დანიშნავდი მოსამართლეს, უზენაეს სასამართლოს წევრის არჩევანში მონაწილეობდნენ, ცენტრალური საარჩევნო კომისიის არჩევა, გენერალური პროკურორის, სახალხო დამცველის არჩევა... ზოგჯერ, როდესაც ხმები იყოფა, მისი ერთი ხმა ყოფილიყო გადამწყვეტი. პრაქტიკულად ისინი იყვნენ პოლიტიკური ძალაუფლების მქონე სუბიექტები და თანაც, ამ შემთხვევაში ხელისუფლება კი არ არჩევდა ვინ უნდა ყოფილიყვნენ, ადამიანები, რომლებიც ფინანსდებიან უცხოეთიდან დონორთან შეთანხმებით იღებდნენ გადაწყვეტილებას, რომ კონკრეტულად ვინ უნდა ყოფილიყო გადაწყვეტილების მიმღები, მაგალითად, ვინ უნდა ყოფილიყო საქართველოს პრეზიდენტობის კანდიდატი, ან უზენაესი სასამართლოს წევრობის კანდიდატი, საკონსტიტუციო სასამართლოს წევრობის კანდიდატი და, ამის პარალელურად, მათ დაიწყეს ისეთი მოთხოვნების წამოყენება როგორიც არის, მაგალითად, შეიქმნეს ტექნიკური მთავრობა რაღაც ეტაპზე, ამ ტექნიკურ მთავრობაში მესამედი უნდა იყვნენ არასამთავრობო ორგანიზაციების წარმომადგენლები, ვეტოს დადების უფლების და ა.შ. სრულად გასცდნენ იმ მანდატს, რაც ბოლო 30-40 წლის განმავლობაში შეიქმნა, მანამდე არასამთავრობო ორგანიზაცია არც იყო ასეთი მანდატის, თვითონ თემაც ნაკლებად იყო... 30 წელია, აქტიურად ნერგავენ ამას დასავლეთიდან", - აცხადებს სოზარ სუბარი.