პირველადმა შეფასებამ აჩვენა, რომ საბაჟო წერტილიდან სამომხმარებლო კალათამდე ფასნამატი შეადგენს 86%-ს. აღნიშნულ სექტორში, როდესაც საუბარი გვაქვს პირველადი მოხმარების საგნებსა და საკვებ პროდუქტებზე, საშუალო მაჩვენებელი არის 35-დან 45%-მდე, სწორედ ეს მიუთითებს, რომ სტრუქტურული პრობლემა გვაქვს, - განაცხადა გადაცემაში „დღის ქრონიკა" ეკონომიკური პოლიტიკის საპარლამენტო კომიტეტის თავმჯდომარემ შოთა ბერეკაშვილმა სასურსათო პროდუქციის ფასების შემცირებასთან დაკავშირებით საუბრისას.

მისივე თქმით, ამ კომისიის მიზანია, რომ სტრუქტურულად შეისწავლოს ბიზნესპროცესები და გაერკვეს რა პრობლემებია.

„რა მიზეზებიც შესაძლებელია თეორიულად გამოწვეული იყოს, პირველ რიგში შესაძლებელია ბიზნესებს და კომპანიებს, რომლებიც ჩართული არიან აღნიშნულ სექტორში მაღალი საოპერაციო ხარჯები აქვთ, შესაძლებელია კაპიტალზე აქვთ პრობლემები და ძვირი უჯდებათ, შესაძლებელია, რომ კონკრეტულ შემთხვევაში ზებუნებრივ მაღალ მოგებასაც ჰქონდეს ადგილი, შესაძლებელია სამივე ფაქტორი ერთად იყო, საჭიროა ამ ფაქტორების შესწავლა. ამ კომისიის მიზანია, რომ სტრუქტურულად შეისწავლოს ბიზნესპროცესები, გაერკვეს რა პრობლემებია და თითოეულ შემთხვევაში არსებობს მექანიზმები, რომლის საშუალებითაც შესაძლებელია არსებული პროცესები დალაგება .

თუ გვაქვს სიტუაცია, სადაც საოპერაციო ხარჯები მნიშვნელოვნად მაღალია, დაისმება კითხვები რატომ არის მაღალი, რა იწვევს, როგორ შეიძლება ოპტიმიზაცია. თუ ჩვენ საუბარი გვაქვს, რომ კაპიტალზე წვდომაზეა პრობლემა, როგორ შეიძლება ეს გაუმჯობესდეს და კომპანიები უფრო კონკურენტუნარიანი გახდნენ და თუ გვაქვს შემთხვევა, რომ ზებუნებრივად მაღალ მოგებაზეა საუბარი, საინტერესო იქნება კომერციული კონტრაქტების ნახვა, რა უპირატესობა აქვს ფასწარმოქმნის ჯაჭვში ამ კომპანიებს.

მიზანი არის, რომ კონკურენტული გარემო შევცვალოთ, რომ თითოეული კომპანია თანაბარ პირობებში იყოს, გაჯანსაღდეს სექტორი, გაუმჯობესდეს კონკურენცია, ეს თავისთავად აისახება საოპერაციო ხარჯის შემცირებაზე და საბოლოო ჯამში სამომხმარებლო კალათაზე ფასები შემცირდება", - აღნიშნა ბერეკაშვილმა.