მიუნხენის უსაფრთხოების კონფერენციის ფარგლებში საგარეო საქმეთა მინისტრი მაკა ბოჭორიშვილი ეუთო-ს მოქმედ თავმჯდომარეს, შვეიცარიის კონფედერაციის საგარეო საქმეთა ფედერალური დეპარტამენტის ხელმძღვანელს, იგნასიო კასისს შეხვდა.

საგარეო საქმეთა სამინისტროს ცნობით, შეხვედრაზე განსაკუთრებული ყურადღება დაეთმო რეგიონში არსებულ უსაფრთხოების გარემოს.

„ამ კონტექსტში ხაზი გაესვა საქართველოს ოკუპირებულ ტერიტორიებზე არსებულ ვითარებას და შვეიცარიის, როგორც საქართველო-რუსეთის ურთიერთობებში შუამავალი ქვეყნის როლს. საგარეო საქმეთა მინისტრებმა ისაუბრეს ეუთო-ს მოქმედი თავმჯდომარეობის დღის წესრიგზე დიალოგის, მშვიდობისა და სტაბილურობის განმტკიცების მიმართულებით. გარდა ამისა, მხარეებმა განიხილეს საქართველოში მიმდინარე პროცესები, საგარეო და საშინაო პოლიტიკის პრიორიტეტები.

დასასრულს მინისტრმა ეუთო-ს მოქმედი თავმჯდომარე საქართველოში მოიწვია", - აღნიშნულია საგარეო უწყების ინფორმაციაში.