აშშ-ის სახელმწიფო მდივანი, მარკო რუბიო მიუნხენის უსაფრთხოების კონფერენციაზე სიტყვით გამოსვლისას, ჩინეთთან ურთიერთობის საკითხს შეეხო.

მისი განცხადებით, აშშ-ის და ჩინეთის ეროვნული ინტერესები ხშირად ერთმანეთს არ ემთხვევა, თუმცა მოლაპარაკებების არ წარმოება გეოპოლიტიკური შეცდომა იქნებოდა.

„ჩვენ ვართ მსოფლიოში ორი უმსხვილესი ეკონომიკა, ორი ზესახელმწიფო. ჩვენ ვალდებულნი ვართ ურთიერთობა ვიქონიოთ და ვაწარმოოთ მათთან დიალოგი. ბევრი თქვენგანიც ვალდებულია ეს გააკეთოს ორმხრივ საფუძველზე. ვგულისხმობ იმას, რომ ჩინეთთან მოლაპარაკებების არ წარმოება გეოპოლიტიკური შეცდომა იქნებოდა. რადგან ჩვენ ვართ ორი დიდი ქვეყანა უზარმაზარი გლობალური ინტერესებით, ჩვენი ინტერესები ხშირად ერთმანეთს არ ემთხვევა. მათი ეროვნული ინტერესები ჩვენსას არ ემთხვევა. ჩვენ მსოფლიოს წინაშე ვართ ვალდებულნი შევეცადოთ ვმართოთ ისინი უკეთესად, რათა თავი ავარიდოთ კონფლიქტებს, როგორც ეკონომიკურს, ისე სხვას, უფრო სერიოზულს. ამიტომაც ჩვენთვის მათთან ურთიერთობა მნიშვნელოვანია", - განაცხადა რუბიომ.

როგორც აშშ-ის პირველმა დიპლომატმა აღნიშნა, ვაშინგტონმა და პეკინმა უნდა იმუშაონ ერთად იმ სფეროებში, სადაც მათი ინტერესები ერთმანეთს ემთხვევა.

„ვფიქრობ, რომ იმ სფეროებში, სადაც ჩვენი ინტერესები ემთხვევა, ჩვენ ერთად უნდა ვიმუშაოთ, რათა მსოფლიოზე პოზიტიური გავლენა მოვახდინოთ და ჩვენ მათთან ერთად ამის შესაძლებლობებს ვეძებთ. ჩვენ გვჭირდება ჩინეთთან ურთიერთობის ქონა. დღეს აქ წარმოდგენილ ნებისმიერ ქვეყანას უნდა ჰქონდეს ურთიერთობები ჩინეთთან და ყოველთვის ესმოდეს, რომ არაფერი, რაზედაც შევთანხმდებით, არ უნდა ეწინააღმდეგებოდეს ეროვნულ ინტერესებს. სიმართლე რომ გითხრათ, ველით, რომ ჩინეთიც, როგორც ნებისმიერი სხვა სახელმწიფო, თავისი ეროვნული ინტერესებით იმოქმედებს. დიპლომატიის მიზანია ეროვნულ ინტერესებს შორის არსებული კონფლიქტები გადაწყვიტოს", - დასძინა რუბიომ.