შესაძლოა, საქართველოს ხელისუფლება უნდა დაფიქრდეს, რამდენად დიდი შედეგების მიღწევაა შესაძლებელი რუსეთთან დიპლომატიური ურთიერთობებით, - ამის შესახებ რუსეთის საგარეო საქმეთა მინისტრის მოადგილემ, მიხაილ გალუზინმა განაცხადა.

„თუმცა, ეს მათი საქმეა. ჩვენ უბრალოდ გვინდა, თბილისმა იცოდეს, რომ მოსკოვი ღიაა თანამშრომლობის გაფართოებისთვის იქ, სადაც ამას ორმხრივი სარგებელი მოაქვს", - აღნიშნა გალუზინმა.

რუსეთის საგარეო უწყების წარმომადგენლის თქმით, საქართველოს სულ უფრო მეტი მოქალაქე აცნობიერებს სააკაშვილის ეპოქის მიდგომით გამოწვეულ ზიანს, როდესაც ყველა ძალისხმევა მიმართული იყო საქართველოს დასავლეთისკენ გადამისამართებისკენ რუსეთთან თანამშრომლობის ხარჯზე.

„როგორც დრომ აჩვენა, ევროკავშირსა და აშშ-ში არავინ ელოდა ქართულ პროდუქციას, რამაც გამოიწვია მრავალი ეკონომიკური სექტორის, მათ შორის სტრატეგიული სექტორის დაცემა. გარდა ამისა, რესპუბლიკის ნატო-სა და ევროკავშირში მიღების დაპირებები აშკარა მანიპულირებაა. ჩვენ ვხედავთ, რომ საქართველოს ამჟამინდელი ხელისუფლება ცდილობს ქვეყნის სუვერენიტეტის აღდგენას. ისინი უკმაყოფილონი არიან იმ სიტუაციით, როდესაც საქართველოს შიდა პოლიტიკის ევროკავშირის საგარეო პოლიტიკისგან გარჩევა რთულია. ჩვენ გვესმის თბილისის მცდელობები, დაასრულოს გარე დიქტატები, ასევე მისი ნაბიჯები ქართული იდენტობის დასაცავად. მზად ვართ რუსეთ-საქართველოს კავშირების გასაღრმავებლად. ეკონომიკური თანამშრომლობა ამჟამად ამ პროცესის მამოძრავებელი ძალაა. 2025 წელს სავაჭრო ბრუნვამ რეკორდულ 2.7 მილიარდ დოლარს მიაღწია. ჩვენს ბაზარზე მოდის ქართული ღვინის ორი მესამედი, ალკოჰოლური სასმელების ნახევარზე მეტი, მინერალური წყლის 40 პროცენტი და ხილის 90 პროცენტი. რუსეთი, თავის მხრივ, საქართველოს ხორბლისა და ზეთის წამყვანი მიმწოდებელია. მსგავსი სიტუაციაა საქართველოს ძირითად ტურიზმის ინდუსტრიაში. თითქმის ყოველი მეოთხე ტურისტი ჩვენი ქვეყნიდანაა. მჯერა, რუსეთთან თანამშრომლობა საქართველოს უპრეცედენტო ეკონომიკური აღდგენის ერთ-ერთი მთავარი ფაქტორია", - აღნიშნა მიხაილ გალუზინმა.