დიდმა ბრინატეთმა აშშ-ს უარი უთხრა, ირანზე თავდასხმის მიზნით გამოიყენოს დიეგო გარსიას კუნძულსა და გლოსტერშირში მდებარე სამხედრო ბაზები.

ამის შესახებ ინფორმაციას „სქაი ნიუსი" ავრცელებს.

ლონდონსა და ვაშინგტონს შორის დადებული შეთანხმებების თანახმად, პენტაგონს ამ ბაზებიდან ოპერაციების დაწყება მხოლოდ ბრიტანეთის მთავრობის წინასწარი თანხმობის შემდეგ შეუძლია.

მედიაში გავრცელებული ინფორმაციით, აშშ-ის სამხედრო ძალები მზად არიან, ირანზე თავდასხმა უკვე ამ უქმეებზე მიიტანონ, თუმცა დონალდ ტრამპს საბოლოო გადაწყვეტილება ჯერ არ მიუღია.

პარალელურად, ირანში აცხადებენ, რომ ვაშინგტონი სამხედრო ძალის გამოყენებას თუ გადაწყვეტს, ახლო აღმოსავლეთში მდებარე ამერიკულ ბაზებზე იერიშს მიიტანენ.

მანამდე, აშშ-ის პრეზიდენტმა, დონალდ ტრამპმა დიდი ბრიტანეთის პრემიერ-მინისტრს, კირ სტარმერს მოუწოდა, არ დათმოს 100-წლიანი იჯარის სანაცვლოდ ინდოეთის ოკეანეში მდებარე კუნძული დიეგო გარსია. როგორც დონალდ ტრამპმა აღნიშნა, ირანთან შეთანხმება თუ ვერ მიიღწევა, შეერთებულ შტატებს, შესაძლოა, დასჭირდეს დიეგო გარსიისა და ფეარფორდის საჰაერო ბაზების გამოყენება.