საგარეო ურთიერთობათა კომიტეტის თავმჯდომარე და ეუთო-ს საპარლამენტო ასამბლეაში საქართველოს პარლამენტის მუდმივმოქმედი დელეგაციის ხელმძღვანელი ნიკოლოზ სამხარაძე ეუთო-ს გენერალურ მდივანს, ფერიდუნ სინირლიოღლუს შეხვდა.

შეხვედრაზე საუბარი ეუთო-ს სამომავლო გეგმებს, ევროპის უსაფრთხოების გარემოსა და ბოლო დროს განვითარებულ მოვლენებს შეეხო.

მხარეებმა ორგანიზაციის საქმიანობაში საქართველოს მნიშვნელოვან და აქტიურ როლზე ისაუბრეს. შეხვედრაზე ყურადღება გამახვილდა იმის თაობაზე, რომ საქართველომ 2027 წელს ორგანიზაციის თავმჯდომარეობაზე შეიტანა განაცხადი.

ნიკოლოზ სამხარაძემ აღნიშნა, რომ საქართველოს თავმჯდომარე ქვეყნად არჩევის შემთხვევაში ეუთო-ს საქმიანობა უფრო სასარგებლო და ეფექტიანი გახდება.

ეუთო-ს გენერალურ მდივანთან შეხვედრაზე ნიკოლოზ სამხარაძემ ქვეყანაში მიმდინარე შიდა პოლიტიკურ პროცესებსა და საპარლამენტო დღის წესრიგზე ისაუბრა.

ავსტრიის დედაქალაქ ვენაში ნიკოლოზ სამხარაძემ შეხვედრა გამართა მედიის თავისუფლების საკითხებში ეუთო-ს წარმომადგენელთან, იან ბრატუსთან. მასთან შეხვედრისას საუბრის ძირითადი თემა მედიის თავისუფლებასთან დაკავშირებული საკითხები იყო.

ინფორმაციას პარლამენტის პრესსამსახური ავრცელებს.