ირანის საგარეო საქმეთა მინისტრი აბას არაღჩი აცხადებს, რომ „არავინ იცის", ვინ იქნება მომდევნო უზენაესი ლიდერი, მას შემდეგ, რაც გავრცელდა ინფორმაცია, რომ პასუხისმგებელმა ორგანომ აიათოლა ალი ხამენეის შემცვლელი აირჩია.

„ბევრი ჭორი ვრცელდება, მაგრამ ჩვენ უნდა დაველოდოთ ექსპერტთა ასამბლეის შეკრებას და ახალი უზენაესი ლიდერის არჩევას", - განაცხადა არაღჩიმ NBC-თან საუბრისას.

არაღჩის თქმით, ვიდრე ასამბლეა შეიკრიბება, დროებითი ლიდერთა საბჭოა პასუხისმგებელი და ყველა ირანული ინსტიტუტი თავის საქმეს ასრულებს.

არაღჩის ასევე ჰკითხეს აშშ-ის პრეზიდენტ დონალდ ტრამპის განცხადებაზე, რომ მას ირანის ახალი ლიდერის არჩევნებში ხმის მიცემის უფლება უნდა ჰქონდეს.

„ჩვენ არავის ვუშვებთ ჩვენს საშინაო საქმეებში ჩარევას. ეს ირანელი ხალხის გადასაწყვეტია. ეს მხოლოდ ირანელი ხალხის საქმეა", - აღნიშნა ირანის საგარეო საქმეთა მინისტრმა.

მისი თქმით, ირანი არც ტრამპის მოთხოვნას მიიღებს უპირობო კაპიტულაციის შესახებ და დასძინა, რომ ირანი თავდაცვის მიზნით მოქმედებას გააგრძელებს, ამასთან აღნიშნა,რომ „ამ ომის გაგრძელება არავის სურს".

არაღჩიმ ასევე გაიმეორა პოზიცია, რომ ირანი არა მეზობლებს, არამედ აშშ-ის ობიექტებს ესხმის თავს სპარსეთის ყურის ქვეყნებში.