აშშ-ის პრეზიდენტი, დონალდ ტრამპი ნატოს რეორგანიზაციის საკითხს განიხილავს, რათა დასაჯოს ის წევრი სახელმწიფოები, რომლებიც ფინანსურ ვალდებულებებს არ ასრულებენ.

ინფორმაციას The Telegraph-ი ავრცელებს.

ამერიკის პრეზიდენტი განიხილავს მოდელს „გადაიხადე თამაშისთვის", რომელიც მოკავშირეებს აუკრძალავს გადაწყვეტილებების მიღებაში მონაწილეობას იმ შემთხვევაშიც კი, თუ ბლოკი ომში ჩაერთვება.

როგორც გამოცემა იუწყება, ეს ტრამპის ერთ-ერთი ვარიანტია მას შემდეგ, რაც მოკავშირეებმა მისი მოწოდება ჰორმუზის სრუტის გასახსნელად საბრძოლო გემების გაგზავნის შესახებ უარყვეს.

როგორც პრეზიდენტთან დაახლოებული პირი გამოცემას უყვება, ტრამპი გასულ წელს პრეზიდენტის სავარძლის დაკავებისთანავე გერმანიიდან სამხედროების გაყვანის საკითხს განიხილავდა.

„იმედგაცრუება, რომელსაც ჩვენ განვიცდით ჩვენი ევროპელი მოკავშირეების გამო, ძალიან რეალურია", - განუცხადა The Telegraph-ს წყარომ ტრამპის ადმინისტრაციიდან. „ქვეყანას, რომელიც 5%-ს არ იხდის, ნატოს სამომავლო დაფინანსების საკითხის გადაწყვეტისას ხმის მიცემის უფლება არ უნდა ჰქონდეს".

დღესდღეობით ნატოს წევრი ყველა ქვეყანა მთლიანი შიდა პროდუქტის არანაკლებ 2%-ს ხარჯავს თავდაცვაზე. ეს ტრამპის მიერ დადგენილი ზღვარია.

ალიანსის გენერალურმა მდივანმა, მარკ რუტემ განაცხადა, რომ ანკარაში წელს გასამართი სამიტის დროს ქვეყნების ლიდერებმა უნდა წარადგინონ გეგმა, თუ როგორ მიაღწევენ 5-პროცენტიან მაჩვენებელს.

The Telegraph-ის ინფორმაციით, ტრამპის გეგმის თანახმად, ნატოს შემადგენლობაში შემავალ იმ ქვეყნებს, რომლებიც დასახულ გეგმას არ შეასრულებენ, ალიანსის გაფართოების შესახებ გადაწყვეტილებებში მონაწილეობის უფლება ჩამოერთმევათ. მათ აგრეთვე არ ექნებათ უფლება მიიღონ მონაწილეობა გადაწყვეტილებაში, რომელიც ნატოს მეხუთე მუხლის ამოქმედებას შეეხება.

„თუ არ იხდით, არ უნდა იღებდეთ მონაწილეობას კენჭისყრაში, რომელიც თანხის ხარჯვას ეხება", - ციტირებს გამოცემა წყაროს.

„უნდა დავიწყოთ საუბარი იმაზე, თუ რა არის საფრთხე და რა უნდა გააკეთოს ალიანსმა. უნდა გავაგზავნოთ მესიჯი, რომ ის, რაც ესპანეთმა და გაერთიანებულმა სამეფომ გააკეთეს, მიუღებელია".