თბილისის სატრანსპორტო კომპანიის მიერ გამოცხადებული ტენდერი, რომელიც ტრამვაის ხაზის პროექტირება-მშენებლობას ეხებოდა, დასრულდა. პროექტთან დაკავშირებით, თბილისის მერმა, "ქართული ოცნება-დემოკრატიული საქართველოს" გენერალურმა მდივანმა, კახა კალაძემ "ღამის კურიერის" ეთერში სტუმრობისას ისაუბრა.

როგორც კახა კალაძემ აღნიშნა, სატენდერო დოკუმენტაცია 4-მა უცხოურმა კომპანიამ წარადგინა, დოკუმენტაციის ანალიზის შემდეგ კი გამარჯვებული კომპანია გამოვლინდება.

მისივე შეფასებით, აღნიშნული პროექტით ქალაქს დაემატება კიდევ ერთი სატრანსპორტო საშუალება, რომელიც ადამიანებს მისცემს იმის შესაძლებლობას, რომ სწრაფად მოხდეს გადაადგილება.

"ჩვენ წინასაარჩევნოდ დავაანონსეთ აღნიშნული პროექტი. ბევრი ვისაუბრეთ, თუ რამდენად მნიშვნელოვანია ქალაქისთვის, ჩვენი სატრანსპორტო პოლიტიკისთვის ამ ტიპის პროექტის განხორციელება. სასიამოვნოა ის, რომ 4 დიდი კომპანია არის დაინტერესებული, მიმდინარეობს დოკუმენტაციის დამუშავება და უახლოეს მომავალში გვეცოდინება, ვინ იქნება გამარჯვებული.

პროექტი დიდი დიღმიდან "დიდუბის" მეტროს მიმართულებით იქნება განხორციელებული. დაახლოებით 7.5 კილომეტრი სიგრძის არის, სადაც 11 გაჩერება იქნება. მე იმედი მაქვს, რომ ეს არ იქნება პირველი და ბოლო ტრამვაის პროექტი. ჩვენს ქალაქს ძალიან უხდებოდა და მომავალშიც, რა თქმა უნდა, მოუხდება ტრამვაი.

დღეს დიდი დიღმიდან გადაადგილება წარმოადგენს ძალიან დიდ პრობლემას. დიდი დიღომი ბოლო პერიოდის განმავლობაში ძალიან ვითარდება, თუმცა ავტომობილებითა და საზოგადოებრივი ტრანსპორტით გამოსვლა არის ძალიან დიდი პრობლემა. შესაბამისად, აღნიშნული პროექტით ემატება კიდევ ერთი სატრანსპორტო საშუალება, რომელიც ადამიანებს მისცემს იმის შესაძლებლობას, რომ ძალიან სწრაფად მოხდეს გადაადგილება "დიდუბის" მეტროს მიმართულებით. ეს, რა თქმა უნდა, შეამცირებს ავტომობილებზე დამოკიდებულებას და მოახდენს მგზავრების სწრაფად გადაადგილებას. მას შემდეგ, რაც გაფორმდება ხელშეკრულება, 36 თვის განმავლობაში კომპანია ვალდებულია პროექტი განახორციელოს," - განაცხადა კახა კალაძემ.