რომის პაპმა, ლეო XIV-მ სააღდგომო ლიტურგიაზე მოუწოდა მორწმუნეებს, არ გახდნენ გულგრილნი მსოფლიოში მიმდინარე კონფლიქტების მიმართ და იმუშაონ მშვიდობისთვის.

პონტიფიკოსის თქმით, უნდობლობასა და შიშს მიეცა საშუალება, „გაწყვიტოს ადამიანებს შორის არსებული კავშირები ომის, უსამართლობისა და ხალხების, ერების იზოლაციის გზით".

„ნუ დავუშვებთ, რომ პარალიზებულნი ვიყოთ!" - მოუწოდა პაპმა სააღდგომო ლიტურგიაზე წმინდა პეტრეს ბაზილიკაში შეკრებილ მორწმუნეებს.

პაპ ლეოს მსახურების დროს კონკრეტული კონფლიქტები არ უხსენებია.

ცნობისთვის, გასულ კვირას პაპმა განაცხადა, რომ ღმერთი არ მიიღებს იმ ლიდერების ლოცვებს, რომლებიც ომებს იწყებენ და „ხელები სისხლში აქვთ გასვრილი". 31 მარტს პონტიფიკოსმა აშშ-ის პრეზიდენტს, დონალდ ტრამპს მოუწოდა, მოძებნოს გამოსავალი ომის დასასრულებლად.

რომის პაპი 5 აპრილს წმინდა პეტრეს მოედანზე სადღესასწაულო მესას ჩაატარებს და სპეციალური გზავნილით გამოვა.