„განტევების ვაცის" წასვლის შემდეგ, ევროპა იძულებულია, საკუთარ თავთან გულწრფელი იყოს, - ამ სათაურით სტატიას გამოცემა „პოლიტიკო" აქვეყნებს.

გამოცემა წერს, ვიქტორ ორბანის წასვლის შემდეგ ლიდერებს აღარავინ ეყოლებათ, ვისაც რაიმეს დააბრალებენ და გადაწყვეტილებებზე პასუხისმგებლობის აღება საკუთარ თავზე მოუწევთ.

„როდესაც ევროკავშირის ლიდერები კვიპროსზე ორდღიანი მოლაპარაკებებისთვის ჩავიდნენ, მათი განწყობა ისეთივე მზიანი იყო, როგორც თავად ეს ხმელთაშუა ზღვის კუნძული. ამის მიზეზი იყო უნგრეთის პრემიერ-მინისტრის, ვიქტორ ორბანის არყოფნაა, რომელიც კოლეგებს 16 წლის განმავლობაში კოლეგებს პრობლემებს უქმნიდა", - წერს „პოლიტიკო".

თუმცა, გამოცემის ცნობით, ბლოკის ურთიერთდაცვის პუნქტზე, ენერგეტიკულ პოლიტიკასა და 1,8 ტრილიონი ევროს მოცულობის შვიდწლიან ბიუჯეტზე ინტენსიური მსჯელობის შემდეგ, ევროპის სახელმწიფოებისა და მთავრობების მეთაურებს საბოლოოდ მოუწიათ საკუთარ თავთან გულწრფელობა, რომ მათი პრობლემები და აზრთა სხვადასხვაობა ბევრად უფრო დიდია, ვიდრე ერთი ადამიანი.

„ორბანი გარკვეულ ასპექტებში ალბათ იყო „განტევების ვაცი" და ყველა მის ზურგს ეფარებოდა", - ამის შესახებ ესტონეთის პრემიერ-მინისტრმა, კრისტენ მიხალმა „პოლიტიკოსთან" ინტერვიუში განაცხადა.

როგორც მან აღნიშნა, მომავალში ლიდერებს მოუწევთ, „თავიანთი განზრახვების შესახებ ღიად და გულწრფელად ისაუბრონ".

მედიის ინფორმაციით, პირველი უთანხმოება უკრაინის საკითხის განხილვისას გაჩნდა, მაშინ, როდესაც ზოგიერთი ლიდერი ევროკავშირში უკრაინის სწრაფ გაწევრიანებას მხარს უჭერდა, მეორე ნაწილი კი ამ პროცესის წინააღმდეგი იყო.

ხორვატიის პრემიერ-მინისტრმა, ანდრეი პლენკოვიჩმა განაცხადა, რომ ბლოკში კიევის სწრაფი გაწევრიანება „რეალისტური არ არის".

„პოლიტიკოს" ინფორმაციით, შემდეგი უთანხმოება ენერგეტიკის საკითხთან დაკავშირებით გაჩნდა.

კვიპროსის პრეზიდენტის, ნიკოს ქრისტოდულიდესის განცხადებით, ევროკავშირის ლიდერებმა 23 აპრილს გამართულ შეხვედრაზე განიხილეს „მოკლევადიანი ზომები", რათა ახლო აღმოსავლეთში ომის შედეგად გამოწვეულ გლობალურ ენერგეტიკულ შოკს გამკლავებოდნენ. თუმცა, მისი თქმით, საბოლოოდ, ამ ზომების გადადება გადაწყვიტეს.

მისივე თქმით, ფინანსთა მინისტრებს დაავალა შეკრება და ერთ თვეში „ძალიან კონკრეტული წინადადებების წარდგენა". ნიკოს ქრისტოდულიდესი იმედოვნებს, რომ ივნისისთვის შეთანხმება იქნება მიღწეული.