ბედნიერი ვარ, რომ ჩვენი ეროვნული მუზეუმი, დავით ლორთქიფანიძის ხელმძღვანელობით, ნამდვილად წარმოადგენს იმ გუნდს, რომელიც არა მხოლოდ შეუნარჩუნებს ჩვენს ქვეყანას ტრადიციებს და ბევრ ახალ აღმოჩენას გააკეთებს, არამედ კიდევ მრავალი წლის განმავლობაში დიდ წარმატებებს მოუტანს ქვეყანას როგორც მნიშვნელოვანი სამეცნიერო აღმოჩენების, ისე კულტურის შენარჩუნებისა და განვითარების კუთხით, - ამის შესახებ საქართველოს კულტურის მინისტრმა, თინათინ რუხაძემ ეროვნულ მუზეუმში საქართველოს ტერიტორიაზე პურის ხორბლის წარმოშობის უძველესი კერის დამადასტურებელი სამეცნიერო კვლევის პრეზენტაციის შემდეგ განაცხადა.

„დღეს გამომსვლელებმა ისაუბრეს, რომ ერთია, როცა იცი, რა კულტურას და რა ქვეყანას წარმოადგენ, ხოლო მეორეა, რომ ამის დასადასტურებლად მეცნიერთა დიდი გუნდი სამეცნიერო დონეზე მუდმივად შრომობს და არცერთი დღით არ შეუწყვეტია მუშაობა. იცით, რომ მრავალი წლის განმავლობაში ხორბლის აღიარებაზე ნომინაცია იყო შედგენილი, შეტანილი და არაერთხელ დაკორექტირებული იყო ტრადიციების საფუძველზე, რაც გასულ წელს იუნესკო-მ აღიარა და მივიღეთ. ამის მიუხედავად, ინტერდისციპლინარული კვლევა მუდმივად მიმდინარეობდა საერთაშორისო მეცნიერების ჩართულობით. ერთია, როცა უტყუარად იცი, რომ შენს ქვეყანას ნამდვილად აქვს ეს ინფორმაცია, მაგრამ მეორეა, რომ ამას ადასტურებს საერთაშორისო, მაღალი კვალიფიკაციის ლაბორატორიული კვლევები. ამ სამეცნიერო აღმოჩენებს ადასტურებს აშშ-დან დაწყებული მრავალი მეცნიერებათა აკადემია. სტატიები ქვეყნდება სხვადასხვა საერთაშორისო გამოცემაში და ეს ნამდვილად დიდი აღიარებაა.

დღეს ძალიან დიდი დღეა არამხოლოდ სამეცნიერო საზოგადოებისთვის. ვულოცავ მთელ საქართველოს - ჩვენ ეს ასობით წლის განმავლობაში ვიცოდით, მაგრამ სამეცნიერო დადასტურება უკვე მსოფლიო დონის აღიარებაა, რასაც ვულოცავ როგორც ჩემს თავს, ისე ქვეყანასა და ხალხს", - განაცხადა თინათინ რუხაძემ.

ცნობისთვის, აშშ-ის მეცნიერებათა ეროვნული აკადემიის ჟურნალში (PNAS) გამოქვეყნდა სტატია სახელწოდებით „სამხრეთ კავკასია, საქართველო, ნეოლითის პერიოდში პურის ხორბლის წარმოშობის დამოუკიდებელი ცენტრი". სტატიაში ნათქვამია, რომ საქართველო პურის ხორბლის (Triticum aestivum) წარმოშობის დამოუკიდებელი და დღეისათვის დოკუმენტურად დადასტურებული უძველესი კერაა.