გიგა ავალიანის საქმეზე, ბრალდების მხარის მიერ დღეს დაყენებული შუამდგომლობა, რომელიც ნია იმნაძის მომდევნო სხდომაზე იძულებით წარდგენას ითვალისწინებს, სასამართლომ დააკმაყოფილა. თუ ნია იმნაძე სასამართლო სხდომაზე თავად არ გამოცხადდება, მას პროცესზე მოწმედ იძულების წესით მიიყვანენ.  ამის შესახებ საქმის პროკურორმა, ქეთევან სანოძემ დღევანდელი სასამართლო სხდომის შემდეგ განაცხადა. გიგა ავალიანის საქმეში ნია იმნაძე ერთ-ერთ მნიშვნელოვან ფიგურად განიხილება.

"სასამართლომ დააკმაყოფილა ბრალდების მხარის შუამდგომლობა მოწმის სახით ნია იმნაძის იძულებით მოყვანასთან დაკავშირებით. 7 მაისის პროცესზე ნია იმნაძე იძულებული გახდება, რომ წარდგენილ იქნეს სასამართლოს წინაშე, წინააღმდეგ შემთხვევაში, მას პოლიცია იძულების წესით მოიყვანს.

რაც შეეხება ჩვენს დასაბუთებას, მოგეხსენებათ, რომ მისმა ადვოკატმა წარმოადგინა ჯანმრთელობის მდგომარეობასთან დაკავშირებული ცნობები, რომლითაც ცდილობდა მისთვის პასუხისმგებლობა აერიდებინა, რომ გამოცხადებულიყო სასამართლოში.

საზოგადოებას მინდა მივაწოდო ინფორმაცია იმასთან დაკავშირებით, რომ ნია იმნაძეს არ აქვს ჯანმრთელობის არანაირი სერიოზული მდგომარეობა, მძიმე მდგომარეობა, რომელიც გამორიცხავს მის მოსვლას სასამართლო პროცესზე. მას არ გააჩნია არანაირი კონკრეტული დიაგნოზი არც გულთან, არც თვალთან და არც ა.შ. სხვადასხვა ორგანოებთან დაკავშირებით, რომელიც შეუძლებელს გახდის მის დაკითხვას.

საპროცესო კანონმდებლობაში რაც არის ჩამონათვალი, იმ ჩამონათვალიდან, თუ ვინ შეიძლება გათავისუფლდეს მოწმის სახით მისაცემი ჩვენებისგან, ამ ჩამონათვალიდან არც ერთში არ ჯდება ნია იმნაძის შემთხვევა, შესაბამისად, ის ვალდებულია, გასცეს კითხვებზე პასუხი და ეს კითხვები აქვს მასთან როგორც პროკურორს, ასევე დაცვის მხარის ადვოკატებს, აქვთ თავად ბრალდებულებს - დემეტრე ჩიქოვანსა და ანი ნასყიდაშვილს, და რაც მთავარია აქვს დაზარალებულის უფლებამონაცვლეს, სახელმწიფოს და საზოგადოებას.

შესაბამისად, მას საკმაოდ კრიტიკულად მოუწევს კონკრეტულ კითხვებზე პასუხის გაცემა. მით უმეტეს, საზოგადოებას არ სჭირდება ამის შეხსენება, მაგრამ ვიცი, რომ ინტერესი დიდია, ამიტომ დავძენ იმასაც, რომ ნია იმნაძე არის სწორედ ის პირი, რომელმაც ე.წ. შევიწროების შესახებ მიაწოდა ინფორმაცია ბრალდებულებს და სწორედ აქედან დაედო დასაბამი აღნიშნულ დანაშაულს. სწორედ ამის გამო, აღნიშნულ ინფორმაციას შეეწირა ახალგაზრდა მასწავლებლის სიცოცხლე და გიგა ავალიანის სიცოცხლის გარდა ამ მიწოდებულმა ინფორმაციამ მოგვიანებით შეიწირა როგორც მისივე შეყვარებულის, ალექსანდრე გაბაშვილის თავისუფლება, ასევე დანარჩენი ბრალდებულების თავისუფლება, რომელთაგანაც ორის პროცესზე ვიმყოფებოდით დღეს და შედგება პროცესი 7 მაისს, როდესაც კითხვებზე პასუხს გაგვცემს ნია იმნაძე", - აცხადებს საქმის პროკურორი ქეთევან სანოძე.

ნია იმნაძე გიგა ავალიანის საქმეზე ერთ-ერთ საკვანძო ფიგურად განიხილება. ბრალდების მხარემ მისი იძულებით მიყვანის შუამდგომლობა დღევანდელ პროცესზე დააყენა და სასამართლომ ის დააკმაყოფილა.

საქალაქო სასამართლოში დღეს ორი არასრულწლოვანის საქმე განიხილეს. პროცესზე საკუთარი პოზიცია დააფიქსირა დაზარალებულის უფლებამონაცვლემ ეკა კუპატაძემაც.

ბრალდების მიხედვით, დემეტრე ჩიქოვანის ჯანმრთელობის განზრახ მძიმე დაზიანების მომზადება ედება ბრალად, ხოლო ანი ნასყიდაშვილის - განსაკუთრებით მძიმე დანაშაულის შეუტყობინებლობა.