რუსეთის შეიარაღებული ძალები უკრაინის სამხედრო-სამრეწველო კომპლექსის საწარმოებზე თანმიმდევრული და სისტემური დარტყმების მიყენებას იწყებენ, - განაცხადეს რუსეთის საგარეო საქმეთა სამინისტროში.

ოფიციალური მოსკოვის განცხადებით, სამიზნეებს შორის იქნება უპილოტო საფრენი აპარატების დაპროექტების, წარმოების, პროგრამირებისა და მომზადების კონკრეტული ადგილები.

რუსული მხარის მტკიცებით, „ამ დრონებს უკრაინული რეჟიმი ნატოელი სპეციალისტების დახმარებით იყენებს, რომლებიც პასუხისმგებელნი არიან კომპონენტების მიწოდებაზე, სადაზვერვო მონაცემების გადაცემასა და მიზანმიმართვაზე".

რუსეთის საგარეო უწყებაში აღნიშნავენ, რომ იერიშები ასევე განხორციელდება „გადაწყვეტილების მიღების ცენტრებსა" და სამეთაურო პუნქტებზე.

ვინაიდან აღნიშნული სამხედრო და ადმინისტრაციული ობიექტები მთელ კიევშია გადანაწილებული, რუსეთის საგარეო საქმეთა სამინისტრომ საგანგებო გაფრთხილება გაავრცელა. უწყება მოუწოდებს უცხო ქვეყნის მოქალაქეებს, მათ შორის დიპლომატიური მისიებისა და საერთაშორისო ორგანიზაციების წარმომადგენლებს, რაც შეიძლება მალე დატოვონ უკრაინის დედაქალაქი.

ამასთანავე, კიევის მოსახლეობას ეძლევა რეკომენდაცია, „უსაფრთხოების მიზნით, თავი შეიკავონ ზელენსკის რეჟიმის სამხედრო და ადმინისტრაციულ ინფრასტრუქტურულ ობიექტებთან მიახლოებისგან".