აზერბაიჯანის საგარეო საქმეთა მინისტრის, ჯეიჰუნ ბაირამოვის განცხადებით, საქართველოსა და თურქეთის საგარეო საქმეთა მინისტრებთან შეხვედრაზე სხვადასხვა საკითხი განიხილეს, მათ შორის ქვეყნების წინაშე არსებული გამოწვევები და სხვადასხვა სფეროში თანამშრომლობის თემები.

„ბევრი ვისაუბრეთ, განვიხილეთ პროექტების განვითარების მდგომარეობა, ის სტადიები, რომლებზეც წინა შეხვედრებზეც არაერთხელ გვქონდა საუბარი და პროგრესი, პოტენციალი, რომელიც მათ აქვთ, ასევე მიმართულებები, რომლებიც საკმაოდ იმედის მომცემია.  აგრეთვე განვიხილეთ გამოწვევები, რომლებიც ჩვენი ქვეყნების წინაშე დგას, კონფლიქტები, რომელიც გვაქვს რეგიონულად, ისევე როგორც საერთაშორისო დონეზე, რომელიც გავლენას ახდენს ჩვენს რეგიონზე. ფაქტობრივად, ჩვენ ვართ ევროპასა და აზიას შორის გზაჯვარედინზე. ჩვენ, აზერბაიჯანი და საქართველო ერთად, კოორდინირებულად ვმუშაობთ და ვცდილობთ, გადავდგათ ნაბიჯები, რათა თანამშრომლობა ახალ დონეზე ავიყვანოთ. ასევე მინდა, დიდი მადლობა გადავუხადო კოლეგებს ვაშინგტონში გამართული სამიტის მხარდაჭერისათვის, რომელმაც მოიტანა პოზიტიური შედეგები, მშვიდობა ამ ქვეყნებს შორის - საუბარია სომხეთსა და აზერბაიაჯანზე. ფაქტობრივად, ჩვენ მოვახერხეთ, მიგვეღწია მდგრადი მშვიდობისათვის. ეს შეგვიძლია, განვიხილოთ, როგორც საკმაოდ პოზიტიური ცვლილებები და განვითარება. საბოლოო ჯამში, მივაღწიეთ სახელმწიფოებს შორის მდგრადი მშვიდობის განვითრებას. გვჭირდება, რომ დარჩენილი საკითხები საკმაოდ ფრთხილად განვიხილოთ და, საბოლოო ჯამში, გადავჭრათ. უფრო მეტიც, გვაინტერესებს მოვლენები, რომლებიც ირანის გარშემო ვითარდება, ასევე ღაზის სექტორში განვითარებული მოვლენები. ღაზის სექტორში მდგრადი მშვიდობის მიღწევა ჩვენთვის მნიშნელოვანია, რადგან ჩვენს რეგიონზე ამ პროცესების ზეგავლენა ძალიან დიდია, ისევე როგორც საერთაშორისო საზოგადოებაზე. გვჭირდება დიპლომატიური გზების გამონახვა. ეს ყველაფერი დაფუძნებული უნდა იყოს საერთაშორისო კანონმდებლობაზე, საერთაშორისო კანონმდებლობის დაცვაზე, მიღწეულ იქნას მდგრადი მშვიდობა და ეს გახდეს უფრო მეტად პრიორიტეტული ამ ქვეყნებში", - განაცხადა ჯეიჰუნ ბაირამოვმა. 

ჯეიჰუნ ბაირამოვმა ასევე დაკავშირებადობის მნიშვნელობასა და ამ კუთხით განხორციელებულ პროექტებზე ისაუბრა. 

„ძალიან მნიშვნელოვანი ენერგეტიკული და სავაჭრო დერეფნები გადის აზერბაიჯანს, საქართველოსა და თურქეთს შორის. გვინდა, ეს პოტენციალი გაიზარდოს. სწორედ ამიტომ განვახორციელეთ და გავიყვანეთ ბაქო-თბილისი-ჯეიჰანის, ბაქო-თბილისი-ერზრუმის მილსადენი, გადავიქეცით ნამდვილ გზაჯვარედინად ამ ენერგომატარებლების გატარების მხრივ. ამით შევძელით რეგიონული დაკავშირებადობის განხორციელება, რამაც, საბოლოო ჯამში, გამოიწვია ამ სამ ქვეყანაში კეთილდღეობის გაზრდა მოსახლეობის სასარგებლოდ. ყველაზე მნიშვნელოვანი ასპექტია ის, რომ ჩვენს ქვეყნებს შორის თანამშრომლობას, რაოდენ მნიშვნელოვანიც უნდა იყოს ეს დანარჩენი მსოფლიოსათვის, პირველ რიგში, ძალიან დიდი მნიშვნელობა აქვს თავად ქვეყნებს შორის ურთიერთობისთვის. ამიტომ, მუდმივად ვმუშაობთ ერთად, ვთანამშრომლობთ როგორც თავდაცვის, ისე ეკონომიკის სამინისტროსთან, რათა სწორედ ამ ინსტიტუტების ჩართულობით განვავითაროთ ჩვენი გეგმები, პროექტები. ზემოხსენებული პროექტების გარდა, დავსახეთ ახალ პროექტებზე თანამშრომლობა და მუშაობის გაგრძელება. მაისის ბოლოს დავიწყეთ ახალი ფაზა გაზის თაობაზე საქართველოსა და აზერბაიაჯანს შორის ხელშეკრულების დადების კუთხით. შევთანხმდით, რომ მეორე ეტაპი დაიწყოს გაზის პროექტის, ბუნებრივი აირის გაყიდვებთან დაკავშირებით. ასევე ჩართული ვართ ცენტრალურ აზიასა და აზერბაიჯანს შორის „მწვანე დერეფნის" განვითარებაში. რა თქმა უნდა, ეს თანამშრომლობა ემსახურება ყველა სხვა პროექტის განვითარებას უფრო ფართო მასშტაბითა და გაგებით. ყველაზე მნიშვნელოვანად მიგვაჩნია რკინიგზის მოდერნიზება, რომელიც საგრძნობლად გაზრდის დაკავშირებადობის პოტენციალს. იყო გარკვეული შეფერხება რკინიგზასთან დაკავშირებით, მაგრამ, საბოლოო ჯამში, მივაღწიეთ პროექტის გახსნას, ამუშავებას.

ასევე ვისაუბრეთ ზანგეზურის დერეფნის თაობაზე. ეს არის ჩვენი დღის წესრიგის ერთ-ერთი საკითხი. რა თქმა უნდა, ბედნიერები ვართ, რომ, საბოლოო ჯამში, რკინიგზა გაიხსნა და ოპერირებს. აგრეთვე განვიხილეთ სხვა თემებიც, კომუნიკაციების საკითხები ახალი ტექნოლოგიების განვითარების თაობაზე. საკმაოდ მძლავრ პოტენციალს და თანამშრომლობის ასპექტს ვხედავთ. ჰუმანიტარული დახმარება არის კიდევ ერთი მნიშვნელოვანი ელემენტი ჩვენი თანამშრომლობისა. მას გარკვეული პოტენციალი აქვს იმ კუთხით, რომ აღვადგინოთ და გავაუმჯობესოთ ისტორიული კავშირები. ვისაუბრეთ გამოწვევებზე, რომლებიც ჩვენი რეგიონისთვის არის დამახასიათებელი, ისევე როგორც კიბერუსაფრთხოება. გვჭირდება ერთობლივი, კოორდინირებული ძალისხმევა, რათა ამ გამოწვევას ვუპასუხოთ, გავუმკლავდეთ. უამრავი საკითხია, რომელიც ამ თემასთან არის დაკავშირებული. წელს მოძმე თურქეთთან დავგეგმეთ კონფერენცია, რომელიც მიეძღვნება კლიმატის ცვლილებებთან დაკავშირებულ საკითხებს. ვფიქრობ, მრავალი ქვეყანა ბევრ სარგებელს მიიღებს ამ კონფერენციით. დაინტერესებული ვართ, აზერბაიჯანის სახელმწიფომ განავითაროს ძმური ურთიერთობები როგორც თურქეთთან, ასევე საქართველოსთან, რაც, საბოლოო ჯამში, გააუმჯობესებს კეთილდღეობას არა მხოლოდ რეგიონში, არამედ ჩვენს ქვეყნებში", - განაცხადა აზერბაიჯანის საგარეო საქმეთა მინისტრმა.