ბიზნესმენი თემურ უგულავა 56 წლის ასაკში გარდაიცვალა. ინფორმაციას ოჯახის წევრები და ახლობლები ადასტურებენ.

ბიზნესმენი ბოლო პერიოდის განმავლობაში ფილტვის სიმსივნის მძიმე ფორმას ებრძოდა. არსებული ინფორმაციით, ის ამერიკის შეერთებულ შტატებში გარდაიცვალა.

თემურ უგულავას დაფუძნებულია "აჭარა ჯგუფი", რომელიც საქართველოს ერთ-ერთ უმსხვილეს სასტუმროთა ქსელს აერთიანებს, ჯგუფის მიერ შექმნილია ქართული ბრენდები "რუმსი" და "სტამბა". ჯგუფი ასევე მართავს თბილისის "ჰოლიდეი ინს".

"აჭარა ჯგუფის" პროექტებს შორისაა "რადიო ქალაქი" და "ფაბრიკა", ასევე სოფლის მეურნეობის მიმართულებით კომპანია "უდაბნო", რომელიც ნუშის ბაღებს მართავს.

"აჭარა ჯგუფი" წლების განმავლობაში მართავდა საქართველოს ონლაინ აზარტული თამაშების სექტორის უმსხვილეს კომპანია კაზინო და ტოტალიზატორ "აჭარას" და "აჭარაბეთს", რომელიც 2019 წელს საქართველოს ბიზნესში ერთ-ერთი უმსხვილესი გარიგებით Flutter Entertainment-მა შეიძინა.

ბიზნესმენ თემურ უგულავას მიერ განხორციელებულ პროექტებს შორისაა სპორტული ტელევიზია და პლატფორმა "სეტანტა", რომელიც არაერთ ქვეყანაში მაუწყებლობს. ასევე, ონლაინ ვაჭრობის პლატფორმა "ველი სთორი" და სკუტერების გაქირავების აპლიკაცია "სქროლი".

ჯორჯიან თაიმსი თანაუგრძნობს თემურ უგულავას ოჯახს და მეგობრებს.