გაერო-ში უკრაინის ელჩის, ანდრეი მელნიკის თქმით, უკრაინამ შესაძლოა, გადახედოს თავის წინადადებას პრაქტიკულად მთელი ფრონტის ხაზის გასწვრივ ცეცხლის შეწყვეტაზე, თუ გაერო-ს უშიშროების საბჭო განაგრძობს რუსულ აგრესიაზე რეაგირების დაყოვნებას.

ამის შესახებ მელნიკმა საბჭოს სხდომაზე სიტყვით გამოსვლისას განაცხადა.

„უკრაინა მზად არის რუსეთთან პირდაპირი მოლაპარაკებისთვის სამართლიანი და მტკიცე მშვიდობის უზრუნველსაყოფად, გაერო-ს წესდების შესაბამისად, თუმცა ჩვენი მოთმინება უსაზღვრო არ არის", - განაცხადა ანდრეი მელნიკმა.

როგორც დიპლომატი ამბობს, გასული 15 თვის განმავლობაში, უკრაინამ არაერთხელ მოუწოდა უშიშროების საბჭოს, მიეღო რეზოლუცია „ცეცხლის სრულად და უპირობოდ შეწყვეტის" შესახებ, თუმცა ეს ძალისხმევა უპასუხოდ დარჩა.

„საბჭო თუ განაგრძობს და შემდგომშიც მიჰყვება პრინციპს, „მოვიცადოთ და ვნახოთ", არ გამოვრიცხავ, რომ უკრაინამ გადახედოს და შეცვალოს თავისი წინადადება. ცეცხლის შეწყვეტა ფრონტის მთელი ხაზის გასწვრივ - ეს უკვე დიდი კომპრომისია", - აღნიშნა ანდრეი მელნიკმა.

მისივე თქმით, ბოლო თვის განმავლობაში, უკრაინამ არსებითად შეცვალა ომის დინამიკა და მის შედეგებს სულ უფრო მეტად შეიგრძნობს რუსეთი. როგორც მელნიკი ამბობს, რუსული ნავთობის გადამამუშავებელი ქარხნების თითქმის 40% უკვე დაზიანებულია.