პაატა ბურჭულაძე - საქართველო დაღუპვის გზაზეა და გადასარჩენია, ცოტა ხანი დასჭირდება, როცა მეცნიერები, ისტორიკოსები დასხდებიან და 4 ოქტომბერს გამარჯვების დღედ აღნიშნავენ  

14:04, 07.10.2025

დავინახე, რომ ჯებირი მოტეხილი იყო, გადავძვერი და რობოკოპებთან მივედი, აქეთ მე ვაჩერებდი, იქით მურთაზი, რომ რამე შეტაკება არ მომხდარიყო, – ამის შესახებ მოძრაობა „რუსთაველის გამზრისი“ ლიდერმა, პაატა ბურჭულაძემ სასამართლო პროცესზე განაცხადა.

როგორც ბურჭულაძემ აღნიშნა, „ქართულ ოცნებას“ სურს, რომ სასამართლოს პროცესზე მყოფი ხალხი ტერორისტებად წარმოადგინოს.

„მინდა მოვყვე, რა ისტორიული დღე იყო 4 ოქტომბერი. პირველად საქართველოს ისტორიაში შეიკრიბა მოქალაქეები მთელი საქართველოდან. იქ წარმოდგენილი ვიყავით, რადგან ვიგრძენით, რომ საშიშროება იყო და ეროვნული კრება ჩავატარეთ. ერთად მივიღეთ დეკლარაცია. საქართველო დაღუპვის გზაზეა და ის გადასარჩენია. სულ ცოტა ხანი დასჭირდება, როცა მეცნიერები, ისტორიკოსები დასხდებიან და აღნიშნავენ ამ დღეს, როგორც გამარჯვების დღეს.

რომ არ მცოდნოდა, ვინ ვარ, ვიფიქრებდი, რომ ტერორისტი ვარ. „ქართულ ოცნებას“ უნდა წარმოადგინოს, რომ აქ ტერორისტები სხედან, მთელი ცხოვრება ბავშვებს, ახალგაზრდებს ვეხმარებოდი. მე მოვუწოდებდი ვინმეს, დანა დაარტყი, მოკალიო? დაიჯერებთ? მთელი ცხოვრება ბავშვებს ვეხმარებოდი.

დავინახე, რომ ჯებირი მოტეხილი იყო, გადავძვერი და „რობოკოპებთან“ მივედი. აქეთ მე ვაჩერებდი, იქით მურთაზი, რომ რამე შეტაკება არ მომხდარიყო. ამას ეძახიან, რომ ჩვენი ვეძახდით ხალხს ძალადობისკენ? ერთხელ მომასხეს სპრეი, მეორედ, მესამედ, მერე ცუდად გავხდი, საავადმყოფოში მომათავსეს. შემოვიდა ეს ახალგაზრდა, პოლიციის უფროსი 7-8 თანმხლები პირით. ჩემში ბინ ლადენი ნახეთ? წნევას მიზომავდნენ, ავტომატებით დამადგნენ, მერე იტყვით, რატომ არ უყვარს პოლიცია ხალხს. ადრე კანონს ემსახურებოდით, ახლა – რეჟიმს. თქვენ თუ ჩემში ხედავთ ტერორისტს, მზად ვარ დავისაჯო, თუ არა, მაინც მზად ვარ დავისაჯო“, – აღნიშნა ბურჭულაძემ.

ცნობისთვის, პაატა ბურჭულაძეს, მურთაზ ზოდელავას, ირაკლი ნადირაძეს, პაატა მანჯგალაძესა და ლაშა ბერიძეს აღკვეთის ღონისძიებად პატიმრობა შეეფარდათ.