საქართველოს საზღვაო ტრანსპორტის სექტორი მნიშვნელოვან ზრდას აჩვენებს. 2026 წლის იანვარ-აპრილის პერიოდში, საქართველოს საზღვაო ნავსადგურებსა და ტერმინალებში ჯამურად გადამუშავებული ტვირთების მოცულობამ 5,949,115 ტონა შეადგინა, რაც გასული წლის ანალოგიური პერიოდის მაჩვენებლებთან 21%-იანი ზრდაა.

ტვირთების საერთო ნაკადის პარალელურად, მზარდი დინამიკა შენარჩუნდა კონტეინერების მიმართულებითაც - საანგარიშო პერიოდში გადამუშავებული კონტეინერების რაოდენობამ (TEU) 8%-იანი მატება აჩვენა. 2026 წლის იანვარ-აპრილში გადამუშავებული კონტეინერების რაოდენობამ 258,583 TEU შეადგინა.

აღსანიშნავია, რომ ჯამური მაჩვენებლების გაუმჯობესების ფონზე, პოზიტიური ტენდენცია დაფიქსირდა ქვეყნის ყველა საზღვაო ნავსადგურში.

ტვირთების კატეგორიების მიხედვით, მატება ყველა ძირითად სეგმენტში ფიქსირდება, რაც მიუთითებს სატრანზიტო დერეფნის აქტივობის კომპლექსურ განვითარებაზე. საანგარიშო პერიოდში საბორნე ტვირთების მოცულობა გაიზარდა 34%-ით, ხოლო გენერალური ტვირთების მაჩვენებელმა 33%-იანი ზრდა აჩვენა. ამასთანავე, 10%-იანი ზრდა დაფიქსირდა კონტეინერიზებული ტვირთების (ტონებში) მიმართულებით, ხოლო ნაყარი ტვირთების მოცულობა 8%-ით გაიზარდა.

2026 წლის პირველი ოთხი თვის მონაცემები კიდევ ერთხელ ადასტურებს საქართველოს, როგორც რეგიონული ლოგისტიკური ჰაბის, მზარდ სტრატეგიულ როლს საერთაშორისო გადაზიდვებში და ხაზს უსვამს ადგილობრივი საზღვაო ინფრასტრუქტურის ეფექტიან მუშაობას გაზრდილი ტვირთნაკადების მიღებისა და დამუშავების პროცესში.

.