უკრაინამ და რუსეთმა 185-185 სამხედრო ტყვე გაცვალეს. უკრაინის პრეზიდენტის, ვოლოდიმირ ზელენსკის განცხადებით, ესენი არიან უკრაინის შეიარაღებული ძალების, ეროვნული გვარდიისა და სახელმწიფო სასაზღვრო სამსახურის ჯარისკაცები, რიგითები, სერჟანტები და ოფიცრები.

„ისინი იცავდნენ ჩვენს ქვეყანას მარიუპოლსა და აზოვსტალში, ასევე დონეცკის, ლუგანსკის, ხარკოვის, ხერსონის, ზაპოროჟიეს, სუმის, კიევისა და კურსკის რაიონებში. მათ შორის არიან ისინი, რომლებიც რუსული ტყვეობის ქვეშ წლების განმავლობაში, 2022 წლიდან იმყოფებიან", - აღნიშნა ზელენსკიმ.

უკრაინის პრეზიდენტმა მადლობა გადაუხადა გაცვლით ღონისძიებებში ჩართულ ყველა ადამიანს. კოორდინაციის შტაბმა განაცხადა, რომ ეს ტყვეების 75-ე გაცვლაა.

185 უკრაინელი სამხედრო მოსამსახურის გარდა, დააბრუნეს ერთი უკრაინელი მშვიდობიანი მოქალაქე, რომელიც რუსებმა 2022 წელს აიყვანეს ტყვედ.

როგორც უკრაინული მედია წერს, დღეს გათავისუფლებული სამხედროების ნახევარზე მეტი 2022 წელს დაატყვევეს, ზოგიერთი მათგანი მარიუპოლის დაცვის დროს. კოორდინაციის შტაბის ცნობით, გათავისუფლებულებს შორის არის უნიკალური ვერტმფრენის ოპერაციის - აზოვსტალში საჰაერო ხიდის მონაწილე.

გათავისუფლებულთაგან ყველაზე ახალგაზრდა 26 წლისაა, ყველაზე უფროსი კი - 62 წლის.