ვიცე-პრემიერმა, საგარეო საქმეთა მინისტრმა მაკა ბოჭორიშვილმა „იმედი ლაივის" ეთერში განაცხადა, რომ ხელისუფლებამ ქვეყანა საომარ მოქმედებებში ჩართვას გადაარჩინა და
მმართველი გუნდის პოზიცია გარკვეული ძალებისთვის მიუღებელი აღმოჩნდა.

„არაფერი გაგვიფუჭებია, ჩვენ უბრალოდ დავიცავით ჩვენი თავი და ჩვენი ქვეყანა. ჩვენ აღმოვჩნდით ის ხელისუფლება, რომელმაც რაღაც აბსტრაქტული საკითხების ფასად ქვეყანა არ გაწირა და არ დააზიანა. შეიძლება გამქრალიყო კიდეც საერთოდ საქართველო საომარ მოქმედებაში ჩართვის პირობებში, არავინ იცის დღეს სად ვიქნებოდით და რთული წარმოსადგენია, რომ დღეს ასე მშვიდად აქ საუბრის შესაძლებლობა გვქონოდა რომელიმეს, 2020 წლიდან საქართველოს ხელისუფლებას ის პოზიციები რომ არ დაეჭირა, რა პოზიციებიც დაიჭირა.

რთული მისაღები აღმოჩნდა ეს გარკვეული ძალების მხრიდან, ერთი პატარა ქვეყანა, ერთი პატარაა პოლიტიკური ძალა "ქართული ოცნება" როგორ ბედავს და როგორ ეწინააღმდეგება იმ ჩაშვებულ, ასე ვთქვათ, სურვილს და გეგმას, რომლის მიხედვითაც ჩვენს ქვეყანას სულ სხვა ფუნქცია შეიძლებოდა ჰქონოდა. და არა ის ფუნქცია, რაზეც ვსაუბრობთ, რომ ვაკავშირებთ დასავლეთს აღმოსავლეთთან და ერთადერთი წვრილი ზოლი ვართ, სადაც მშვიდობა არის და არ ცვივა ბომბები. ეს არ იყო იქნებ ის ფუნქცია, რაც ჩვენი ქვეყნის ფუნქციად წარმოედგინათ. რატომ ესხმიან საქართველოს თავს ეს კიდევ სხვა საკითხია, თუმცა სხვა ახსნა ამას არ აქვს."- განაცხადა მაკა ბოჭორიშვილმა.

მინისტრმა ყურადღება გაამახვილა საერთაშორისო სანქციების შესრულების საკითხზე და აღნიშნა, რომ საქართველო ამ პროცესს სრული პასუხისმგებლობით ეკიდება, რასაც პარტნიორი ქვეყნებისგან ადეკვატური შეფასება უნდა მოჰყვებოდეს.

„საქართველოს არაფერი დაუშავებია და ყველა სანქციის შემოღების დღიდან კეთილსინდისიერად ასრულებს მათ. მე ხმამაღლა შემიძლია ვთქვა, რომ ჩვენსავით კეთილსინდისიერად თავად ევროკავშირის წევრი ქვეყნები არ იქცევიან და თავად დაჭირდათ დაცვის ახალი მექანიზმების და პაკეტების შემუშავება სანქციების შესრულების უზრუნველსაყოფად. ერთი პატარა ქვეყანა, რომელიც ძალიან მძიმე გეოპოლიტიკურ მოცემულობაში არსებობს ახერხებს იმას, რომ ჰქონდეს ისეთი სახელმწიფო სტრუქტურა, ისეთი პოლიტიკა, რომ სანქციების დარღვევის არცერთი ფაქტი არ უფიქსირდებოდეს ამ მოცემულობაში. და მიუხედავად ამისა, არ წყდება ამ ქვეყანაზე თავდასხმა, მიუხედავად ამისა, არ წყდება გამოგონილი სტატიების წერა", - აღნიშნა საგარეო საქმეთა მინისტრმა.

მაკა ბოჭორიშვილი გადაცემაში ასევე გამოეხმაურა დიდი ბრიტანეთის საელჩოს განცხადებას დასანქცირებულ გემთან დაკავშირებით და აღნიშნა, რომ მსგავსი ფორმით ინფორმაციის გავრცელება ქვეყნის იმიჯს აზიანებს.

„თითქოს არაფერი დაშავებულა ამ განცხადებით, უბრალოდ ისე ახსენეს, რომ ეს გემი საქართველოშიც არის ნამყოფი. რა საჭიროა ამის ხსენება ამ ფორმაში, როდესაც ვსაუბრობთ გემის დასანქცირებაზე, რატომ უნდა გაკეთდეს ასეთი აქცენტი საქართველოზე, როდესაც ეს გემი ბევრ სხვა ქვეყანაშიც იმყოფებოდა. მაშინ ნაწილობრივ ნუ მოგვაწოდებთ ამ ინფორმაციას, რომ რაღაც ორაზროვანი დასკვნა გაკეთდეს ამ განცხადებიდან. ეს გემი საქართველოს გარდა დანიაშიც იმყოფებოდა, მალტაშიც და აზიის და აფრიკის ბევრ ქვეყანაში. მაშინ ჩვენს საზოგადოებას ეს ინფორმაცია სრულად უნდა მივაწოდოთ, თუკი უნდა ვისაუბროთ სად იმყოფებოდა გემი დასანქცირებამდე.

დასანქცირების შემდეგ იმყოფებოდა საქართველოში? - არა. მაშინ რა საჭიროა ასეთი ფორმით საუბარი. არაერთი არასწორი მანიპულაცია ინფორმაციის, არაერთი დეზინფორმაცია და ასე ზიანდება ჩვენი ქვეყნის იმიჯი და ამიტომაც ვეღარ შევძლებდით, რომ უბრალოდ არ მიგვექცია ყურადღება ამ განცხადებისთვის და არ დაგვეფიქსირებინა ბრიტანეთის ელჩისთვის ჩვენი წუხილი", - განაცხადა ვიცე-პრემიერმა.