წინასწარი შეფასებით, საქართველოში მაისში რეალურმა ეკონომიკურმა ზრდამ 6.4% შეადგინა. შედეგად, მიმდინარე წლის პირველი ხუთი თვის (იანვარ-მაისის) ეკონომიკური ზრდის მაჩვენებელი 7.8%-ს გაუტოლდა.

ეკონომიკისა და მდგრადი განვითარების სამინისტროს ცნობით, მაისში დღგ-ის გადამხდელ საწარმოთა ბრუნვა, წინა წლის შესაბამისი თვის მაჩვენებელთან შედარებით, 8.7%-ით გაიზარდა. ამასთანავე, ახლად დარეგისტრირებულ საწარმოთა რაოდენობა 2.2%-ით გაიზარდა და 6,542 ერთეული შეადგინა.

მაისის ეკონომიკურ ზრდაში მნიშვნელოვანი პოზიტიური წვლილი შეიტანა ეკონომიკური აქტივობის ზრდამ ისეთ სექტორებში, როგორებიცაა: ინფორმაცია და კომუნიკაცია, საფინანსო და სადაზღვევო საქმიანობა, დამამუშავებელი მრეწველობა, ტრანსპორტი და დასაწყობება, ჯანდაცვა და უძრავ ქონებასთან დაკავშირებული საქმიანობები.

ამასთანავე, როგორც ეკონომიკის სამინისტროს მიერ გავრცელებულ ინფორმაციაშია ნათქვამი, იანვარ-მაისის მაღალ ეკონომიკურ ზრდას ხელი შეუწყო საგარეო ვაჭრობის მიმართულებით დაფიქსირებულმა პოზიტიურმა ტენდენციებმა. კერძოდ, ექსპორტი 19.8%-ით გაიზარდა და 3,107.7 მილიონი აშშ დოლარი შეადგინა, ხოლო ადგილობრივი ექსპორტის (ექსპორტი რეექსპორტის გამორიცხვით) მაჩვენებელმა 66.1%-ით მოიმატა და 1,929.1 მილიონ აშშ დოლარს მიაღწია.

საქართველოს ეკონომიკაში დაფიქსირებული პოზიტიური ტენდენციები და მაღალი ეკონომიკური ზრდა ნათლად მიანიშნებს, რომ ქვეყნის ეკონომიკა მდგრადობას ინარჩუნებს.