როდის დასრულდება პანდემია - ჯანმო-ს ევროპის რეგიონული ოფისის განცხადება

"ხშირად მეკითხებიან, თუ როდის დასრულდება პანდემია", - აცხადებს, ჰანს ჰენრი კლუგე, ჯანმო-ს ევროპის რეგიონული ოფისის დირექტორი.

 

"მიუხედავად იმისა, რომ ზაფხული დადგა, პანდემია შორს არის დასრულებიდან. პანდემიურმა დაღლილობამ გავლენა მოახდინა ჩვენს კოლექტიურ ფსიქიკურ ჯანმრთელობაზე და ბუნებრივია, რომ ასეთი რთული პერიოდის შემდეგ ყველას დასვენება გვსურს.

 

თუმცა, გასულ ზაფხულს იგივე სიტუაციაში ვიყავით. როდესაც მთელს რეგიონში შეზღუდვები ნაადრევად შემსუბუქდა, აღინიშნა კორონავირუსის შემთხვევებისა და სიკვდილიანობის კატასტროფული ზრდა, რამაც ისევ ლოქდაუნისკენ მოგვაბრუნა. ახლა, ჯანდაცვის სისტემებზე, სკოლაზე, საარსებო წყაროებზე, ეკონომიკებზე, ფიზიკურ და ფსიქიკურ ჯანმრთელობაზე ერთწლიანი ზეწოლის შემდეგ, იგივე შეცდომის დაშვება არ შეგვიძლია.

 

ევროპის რეგიონში ვაქცინაცია სწრაფი ტემპით მიმდინარეობს, მიუხედავად ამისა, მოსახლეობის დიდი ნაწილი არ არის ვაქცინირებული, ამავდროულად კი ვრცელდება შეშფოთების გამომწვევი ძალიან გადამდები ვარიანტები. ხდება საზოგადოებრივი ჯანდაცვისა და სოციალური ზომების შემსუბუქება, რაც იწვევს COVID-19-ის შემთხვევების ზრდას; მოსახლეობის იმ ფენებში, სადაც ვაქცინაციის მაჩვენებლები არ არის მაღალი, განსაკუთრებით ყველაზე დაუცველებს შორის, იზრდება ზეწოლა ჯანდაცვის სისტემებზე და ჰოსპიტალიზაციისა და სიკვდილიანობის მაჩვენებელი.

 

წელს, მიუხედავად იმისა, რომ გვინდა, რომ ზაფხულში მაქსიმალურად დავისვენოთ, სიფრთხილე გვმართებს, რათა თავიდან ავირიდოთ ავად გახდომა, სიკვდილი და პანდემია მალე დავასრულოთ.

 

ამ მიზნის მისაღწევად, რამოდენიმე გზა არსებობს: პირველ რიგში - ეს არის ვაქცინა. მეორე, თუ მოგზაურობა გსურთ, დაფიქრდით მის საჭიროებაზე. თუ მაინც გადაწყვეტთ იმოგზაუროთ, გააკეთეთ ეს უსაფრთხოდ.

 

უსაფრთხოდ მოგზაურობა ნიშნავს COVID-19–თან დაკავშირებული რისკების გაზომვას. სახლიდან გასვლის მომენტიდან დანიშნულების ადგილას მისვლამდე. ჩვენ უნდა ვიყოთ საკუთარი თავების რისკის მენეჯერები. რისკები უნდა შევაფასოთ და მივიღოთ უსაფრთხოების ზომები ყოველ ნაბიჯზე: დავიცვათ ფიზიკური დისტანცია, თავი ავარიდოთ ხალხმრავლობას და ვატაროთ პირბადე.

 

მოერიდეთ დახურულ და ხალხმრავალ სივრცეებს. შეხვდით ადამიანებს გარე სივრცეებში, ან ღია და კარგად ვენტილირებულ სივრცეებში, ამით ვირუსის გავრცელებას შევამცირებთ.

 

გადამწყვეტი მნიშვნელობა ექნება იმას, თუ რამდენად დავუშვებთ დიდი სპორტულ ღონისძიებები და ფესტივალები გახდნენ ვირუსის სუპერ გამავრცელებელი სივრცეები საზოგადოებრივი ჯანმრთელობისა და უსაფრთხოების ზომების დაცვით.

 

ვაქცინაციას უკვე აქვს დადებითი გავლენა და კიდევ უფრო შეამცირებს ჰოსპიტალიზაციისა და სიკვდილიანობის მაჩვენებელს და ჯანდაცვის სისტემებზე ზეწოლას. მიუხედავად ამისა, მილიონობით მეტი ვაქცინაა საჭირო რისკის ქვეშ მყოფი პირების ასაცრელად, რომელთა უმეტესობა ჯერ კიდევ ელოდება პირველ დოზას. ჯანდაცვის მუშაკებს, ასაკოვან ადამიანებს და მათ, ვისაც ქრონიკული დაავადებები აწუხებთ წვდომა უნდა ჰქონდეთ ვაქცინებზე, რათა ჰოსპიტალიზაციისა და სიკვდილიანობის გრძელვადიანი შემცირება მოხდეს.

 

ამჟამად, ევროპის რეგიონში მოსახლეობის 41%-ია ერთი დოზით აცრილი, 29% კი - სრულად ვაქცინირებული. ეს მონაცემები ცხადჰყოფს, რომ პანდემია არ დასრულებულა, მათ შორის, არც იმ ქვეყნებში, რომლებმაც ვაქცინაციის მაღალ დონეს მიაღწიეს. რეგიონში ვაქცინების გადანაწილებაში უთანასწორობა რჩება ჩვენს უდიდეს გამოწვევად.

 

უფრო გადამდები დელტა ვარიანტი იწვევს შემთხვევებისა და ჰოსპიტალიზაციის ზრდას. შესაბამისად, აუცილებელია ჩვენს ხელთ არსებული საშუალებების გამოყენება, რათა თავიდან იქნას აცილებული ვირუსის გავრცელება და ვიხსნათ ადამიანების სიცოცხლე, მოვახდინოთ საზოგადოებრივი ჯანმრთელობისა და უსაფრთხოების ზომების მორგება ადგილობრივი კონტექსტისთვის და სამართლიანი და სწრაფი ვაქცინაციის უზრუნველყოფა.

 

WHO-ს „საგანგებო სიტუაციაში გამოყენების დაშვების (Emergency Use Listing)“ მქონე ყველა ვაქცინა უსაფრთხო და ეფექტურია კოვიდ-19-ის რთული ფორმებისა და არსებული ვარიანტების გავრცელების პრევენციის კუთხით.

 

ხშირად მეკითხებიან, თუ როდის დასრულდება პანდემია. პასუხი მარტივია: ეს თქვენზეა დამოკიდებული. ეს ადამიანებისა და მთავრობების ხელშია. ჩვენ ვიცით რა არის ეფექტური პანდემიის წინააღმდეგ; ჩვენ გვაქვს მტკიცებულებები. არ დაკარგოთ იმედი. საკუთარი თავისა და გარშემომყოფების დაცვა უაღრესად მნიშვნელოვანია, პანდემიის კონტროლქვეშ მოსაქცევად - და საბოლოოდ - მის დასასრულებლად.

 

ჩვენ ბევრს გავუძელით, ახლა არ არის ყურადღების მოდუნების დრო" , - ვკითხულობთ ჯანმო-ს ევროპის რეგიონული ოფისის განცხადებაში.





მსგავსი სიახლეები
თურქეთის სამხრეთ-დასავლეთით მდებარე ტურისტული ზონებიდან ევაკუაცია განხორციელდა
"რთულად მოპოვებული წარმატებები შესაძლოა, საფრთხის წინაშე აღმოჩნდეს"
„ბუბლიკების“ გამყიდველობიდან თურქეთის პრეზიდენტობამდე - როგორია რეჯებ თაიფ ერდოღანის ცხოვრება
„კოლექტიური ოპოზიცია“ მაინც აგრძელებს დასავლეთის მიმართულებით ქვების სროლას - ზაალ ანჯაფარიძე
„ქართული ოცნების" გადაწყვეტილება არის უკუსვლა დემოკრატიის განვითარების გზაზე - გიორგი კვირიკაშვილი
კიბერშეტევების გამო, შესაძლოა, ნამდვილი ომი დაიწყოს - ჯო ბაიდენი
რა უძრავ ქონებას ფლობს ვატიკანი - ცნობილი ხდება საბიუჯეტო მონაცემები
იგეგმება თუ არა ქვეყანაში მორიგი „ლოქდაუნი“ - ნათია თურნავას განმარტება
ამ დროისთვის მსოფლიოში ყველაზე დიდი რისკი დელტაა - ექსპერტები
"რუსეთის სამხედრო-საზღვაო ძალები მზად არის, მოუგერიებელი დარტყმა განახორციელოს მტრის სამიზნეებზე"
ხალდეობა აუცილებლად გახდება საერთო სახალხო, თავისუფლების დღესასწაული - სოზარ სუბარი
"ჯობს გვერდში დაუდგეთ ხელისუფლებას და სხვის სახიფათო თამაშებში თქვენს პაიკებად გამოყენებაზე მტკიცე უარი განაცხადოთ"
''ჩვენ თქვენთვის ვმუშაობთ!''- გვიყვარხართ და გვიგულეთ თქვენს გვერდით! - ნანა გაგუა
რა ინტერვალია Pfizer-ის დოზებს შორის ყველაზე ეფექტური
კობა კობალაძემ ანზორ ჩუბინიძესთან მეგობრული შეხვედრა გამართა
"ათი წლის წინ ნორვეგიაში მოკლული ახალგაზრდები დემოკრატიის მომავალი იყვნენ"
ჩინეთმა ჯანმო-სთან თანამშრომლობაზე უარი განაცხადა
იუნესკო-მ ქალაქი ლივერპული მსოფლიო მემკვიდრეობის ნუსხიდან ამოიღო
ჯანმო ახალ საფრთხეზე - "ლამბდა" შტამი მთელს მსოფლიოში ვრცელდება
როდის დასრულდება პანდემია - ჯანმო-ს ევროპის რეგიონული ოფისის განცხადება