ბრიტანულ გაზეთ „გარდიანში“ (The Guardian) გამოქვეყნებულია სტატია სათაურით „მკვლევარებმა მიკროპლასტიკური ნაწილაკები ფერმერების შინაური ცხოველების ხორცში, სისხლში და რძეშიც აღმოაჩინეს“ (ავტორი - დემიან ქერინგტონი).
როგორც პუბლიკაციაშია ნათქვამი, ამსტერდამის თავისუფალი უნივერსიტეტის მეცნიერებმა მიკროპლასტიკის, მათ შორის პოლიეთილენისა და პოლისტიროლის ნაწილაკები ჰოლანდიელთა ფერმების ცხოველთა ხორცში, სისიხლში და რძეში აღმოაჩინეს.
მკვლევარებმა ექსპერიმენტის დროს ძროხებისა და ღორების სისხლის 12-12 ნიმუში გამოიკვლიეს და ყოველ სინჯში მიკროპლასტიკა იპოვეს, მათ შორის პოლიეთილენი და პოლისტიროლი. გარდა ამისა, ეს ნივთიერებები რძის 25 სინჯიდან 18-ში აღმოჩნდა. რძის სინჯები აღებული იქნა როგორც უშუალოდ ფერმებში ძროხების მოწველის შემდეგ, ასევე სუპერმარკეტებში, მუყაოს ყუთებში ჩასხმულ რძიდან. ასევე მიკროპლასტიკს შეიცავდნენ საქონლის ხორცის 7 სინჯი 8-დან და ღორის ხორცის 5 სინჯი 8-დან. მიკროპლტიკის ნაწილეკები იპოვეს აგრეთვე საქონლის გრანულისებურ საკვებში, რაც იმას ნიშნავს, რომ პოლიეთილენი და პოლისტიროლი ცხოველების ორგანიზმში სწორედ საკვებისაგან მოხვდა.
გარდა ამისა, მიზეზი შეიძლება იყოს ის პლასტიკური შეფუთვა, რითაც საქონლის საკვები იყიდება. მართალია, ცხოველურ პროდუქტებში აღმოჩენილი პლასტიკის გავლენა ადამიანის ჯანმრთელობაზე ყოველდღიურ ცხოვრებაში კონკრეტულად ჯერ-ჯერობით უცნობია, მეცნიერები მაინც შეშფოთებულნი არიან - ლაბორატორიულ პირობებში პლასტიკური ნაწილაკები ადამიანის უჯრედების დაზიანებას იწვევენ. ასევე შემაშფოთებელია პლასტიკით გაჭუჭყიანებული ჰაერის მოცულობის ზრდა, რომლის გამოც მილიონობით ადამიანი იღუპება. როგორც „გარდიანი“ წერს, გარემოში უდიდესი რაოდენობით პლასტიკური ნაგავი იყრება, რის შედეგადაც თითქმის მთელი დედამიწა დაბინძურებულია - ევერესტის მთის სიმაღლიდან დაწყებული, ოკეანის კილომეტრებიან სიღრმემდე. როგორც მეცნიერებმა დაადგინეს, ადამიანები პლასტიკის მიკრონაწილაკებს საკვებთან, წყალთან და ჰაერთან ერთად იღებენ.
პლასტიკის შემცველობის ტესტირება მიმდინარე წელს ჯერ-ჯერობით მხოლოდ ნიდერლანდებში გაკეთდა, მაგრამ შარშან, 2021 წელს, ის აღმოჩენილი იქნა საფრანგეთშიც და შვეიცარიაშიც - როგორც მაღაზიებში ნაყიდ, ისე ფერმერულ რძეში. ეკოლოგიური ორგანიზაციის - Plastic Soup Foundation-ის წარმომადგენლის მარია ვესტერბოსის განცხადებით, „ცხოველთა საკვები მსოფლიოში მკაცრად უნდა იქნეს დაცული პლასტიკური ნაწილების მოხვედრისაგან, რომლებიც შემდეგ ადამიანთა ორგანიზმშიც აღწევენ. ცხოველთა ჯანმრთელობის დაცვა ადამიანის ჯანმრთელობის დაცვასაც ნიშნავს“.
მსგავსი სიახლეები