ამერიკულ პრესაში, კონგრესის შუალედური არჩევნების მოახლოებასთან დაკავშირებით, რომელიც ნოემბერში უნდა გაიმართოს, გააქტიურდა დისკუსია დემოკრატიული პარტიის პერსპექტივის შესახებ - შეინარჩუნებენ თუ არა „ვირები“ უმრავლესობას კონგრესში (სენატში და წარმომადგენელთა პალატაში). დისკუსია არის გაჩაღებული აგრეთვე დემოკრატ პრეზიდენტის ჯო ბაიდენის ირგვლივაც - რამდენად შესაძლებელია მეორე ვადით - 2024 წელს - პრეზიდენტად მისი არჩევა?

გაზეთ „ნიუ-იორკ თაიმსში“ (The New York Times) გამოქვეყნებულია სტატია სათაურით „ახალმა გამოკითხვამ აჩვენა, რომ დემოკრატების უმრავლესობას 2024 წელს პრეზიდენტად ჯო ბაიდენის ხილვა აღარ სურთ“ (ავტორი - შეინ გოლდმახერი).

გთავაზობთ პუბლიკაციის მოკლე შინაარსს:

ჯო ბაიდენი თავის თანაპარტიელებში სკეპტიციზმის საგანგაშო დონის წინაშე დგება: დემოკრატი ამომრჩევლების 64%-მა განაცხადა, რომ 2024 წლის საპრეზიდენტო არჩევნებში მათთვის სასურველი იქნებოდა სხვა კანდიდატის ხილვა, ვიდრე ჯო ბაიდენისა. ამჟამინდელი პრეზიდენტის საქმიანობას, მთელი ქვეყნის მასშტაბით, ამერიკელთა მხოლოდ 33% იწონებს.

ამერიკელთა ნეგატიური განწყობა გამოწვეულია ეკონომიკაში შექმნილი სიტუაციით - მაღალი დონის ინფლაციით, გაძვირებით და ა.შ. დარეგისტრირებული ამომრჩევლების სამ მეოთხედზე  მეტი თვლის, რომ ამერიკის შეერთებული შტატები არასწორი მიმართულებით მიდის, „პესიმისტური განწყობები სულ უფრო მეტ ამერიკელს ეუფლება ქვეყნის ყველა კუთხეში, საზოგადოების ყველა ფენებში - ასაკობრივ და რასობრივ ჯგუფებში, ქალაქებში და სასოფლო-სამეურნეო რეგიონებში, აგრეთვე პოლიტიკურ პარტიებში“.

ასეთი განწყობის გამო ამერიკელებში პრეზიდენტ ჯო ბაიდენის რეიტინგი ძალიან სახიფათო ნიშნულამდე დაეცა. მის საქმიანობას ქვეყნის მეთაურის პოსტზე არ იწონებს არამარტო რესპუბლიკური პარტიის უმრავლესობა, არამედ დამოუკიდებელი კანდიდატების მომხრეთა ორი მესამედი.

დემოკრატებს შორის ჯო ბაიდენის პოპულარობა 70%-ს შეადგენს, რაც საკმაოდ დაბალ მაჩვენებლად ითვლება პრეზიდენტისათვის, განსაკუთრებით აშშ-ის კონგრესის შუალედური არჩევნების წინა პერიოდში. მისი კანდიდატურის მეორედ ვადით წარდგენას 2024 წლის საპრეზიდენტო არჩევნებში მხოლოდ 26% იწონებს, რაც ჯო ბაიდენის ელექტორალური ბაზის - ამომრჩევლების ღრმა იმედგაცრუებას ადასტურებს.

თვითონ ჯო ბაიდენს ადრეც არაერთხელ აქვს გაცხადებული, რომ თავის კანდიდატურას მეორე ვადით აუცილებლად წარადგენს. არადა, იგი უკვე 79 წლისაა და ამრიგად, აშშ-ის ისტორიაში ყველაზე მოხუც, ყველაზე მხცოვან პრეზიდენტად ითვლება. კაცმა რომ თქვას, სწორედ პრეზიდენტის ასაკი იწვევს დემოკრატ ამომრჩევლებში ყველაზე მეტ ნეგატიურ ასოციაციებს და ამიტომ ისინი მოითხოვენ, რომ პარტიამ ჯო ბაიდენს ალტერნატივა მოუძებნოს.

ჯო ბაიდენის კანდიდატურა ყველაზე მიუღებლად ახალგაზრდა ამომრჩევლებში ითვლება - 30 წლამდე გამოკითხულების 94%-მა აღიარა, რომ მათ სხვა პრეზიდენტობის კანდიდატის ხილვა სურთ.

რეკორდული ინფლაციის ფონზე ამომრჩეველთა 75% აცხადებს, რომ მათთვის ამჟამად ყველაზე პრიორიტეტული და მნიშვნელოვანია ქვეყნის ეკონომიკური მდგომარეობა, რომელსაც „კარგად“ და „საუკეთესოდ“ აფასებს მხოლოდ 6%, „ცუდად“ და „არადამაკმაყოფილებლად“ კი 93%.

თეთრი სახლი ცდილობს ამერიკელები დაარწმუნოს და აცხადებს, რომ ჯო ბაიდენის პრეზიდენტობის დროს ამერიკის ისტორიაში „სამუშაო ადგილების ყველაზე სწრაფი აღდგენა მიმდინარეობს“, მაგრამ გამოკითხვის შედეგებმა აჩვენა უდიდესი სხვაობა ამ ტრაბახსა და რეალურ ფინანსურ-ეკონომიკურ სიტუაციას შორის, რომელსაც ამერიკელთა აბსოლუტური რაოდენობა საკუთარ თავზე გრძნობს. 

ამასთან ერთად, გამოკითხვის შედეგები ჯო ბაიდენს მცირე იმედსაც აძლევს: დემოკრატ-ამომრჩეველთა 92%ს შეუძლია დაივიწყოს თავისი ნეგატიური განწყობა და ხმა ისევ მოქმედ პრეზიდენტს მისცეს იმ შემთხვევაში, თუ მისი მეტოქე რესპუბლიკელი დონალდ ტრამპი იქნება.

წყარო