დიდი ბრიტანეთის მიერ რუსეთის წინააღმდეგ დაწესებული სანქციების ბოლო ტალღა არ შეეხო ნავთობსადენს, რომელიც უნგრეთსა და ევროკავშირის ლიდერებს შორის მწვავე დავის საგანია. ინფორმაციას ამის შესახებ სააგენტო POLITICO ავრცელებს.

სამშაბათს ლონდონმა თითქმის 300 ახალი სანქცია გამოაცხადა, რითაც ვლადიმირ პუტინის მიერ უკრაინაში სრულმასშტაბური შეჭრის მეოთხე წლისთავს გამოეხმაურა. გაერთიანებული სამეფოს საგარეო საქმეთა მდივანმა, ივეტ კუპერმა განაცხადა, რომ ბრიტანეთი იღებს „გადამწყვეტ ზომებს" იმ „შემოსავლის წყაროების წინააღმდეგ, რომლებიც რუსეთის აგრესიას ასაზრდოებს".

სამიზნეებს შორის მოხვდა ნავთობის სატრანსპორტო კომპანია „ტრანსნეფტი", რომელიც მართავს ნავთობსადენ „დრუჟბას" რუსულ მონაკვეთს. აღნიშნული მილსადენით საწვავი კვლავ მიეწოდება უნგრეთსა და სლოვაკეთს.

საგარეო, თანამეგობრობისა და განვითარების საქმეთა სამინისტრომ (FCDO) განაცხადა, რომ აღნიშნული კომპანია „პასუხისმგებელია რუსული ნავთობის ექსპორტის 80 პროცენტზე მეტის ტრანსპორტირებაზე, რაც კიდევ უფრო აფერხებს კრემლის სასოწარკვეთილ მცდელობას, მოძებნოს მყიდველები თავისი სანქცირებული ნავთობისთვის".

თუმცა, გაერთიანებული სამეფოს ფინანსური სანქციების აღსრულების ოფისის მიერ სამშაბათს გამოქვეყნებულ ახალ დოკუმენტში, ნავთობსადენი „დრუჟბა" შეყვანილია რუსეთის სანქციების რეჟიმით გათვალისწინებულ „გამონაკლის პროექტებს" შორის.